Li girtîgehên Kurdistan û Tirkiyeyê binpêkirinên li hemberî girtiyên nexweş dewam dikin. Gelek girtî ji mafên xwe yên jiyanê û tenduristiyê bêpar tên hiştin. Li gorî daneyên Komeleya Mafên Mirovan (ÎHD) hezar û 400 girtiyên nexweş li girtîgehê ne, hejmara girtiyên bi nexweşiya giran jî 335 e. Ev hejmar roj bi roj zêde dibe, ji bo girtiyên ku tevî nexweşiyên kronîk sewqî Saziya Tiba Edlî hatine kirin jî, rapora “li girtîgehê dikare bimîne” yan jî “dikare jiyana xwe bi tena serê xwe bidomîne” tê dayîn. Yek ji van jî nexweşê penceşêrê Botan Karsu ye. Karsu 11 sal in girtî ye, li girtîgehê ev nexweşî pê re derket. Hat zanîn ku tevî daxwazên sewqê jî bi hefteyane sewqî nexweşxaneyê nehatiye kirin. Saziya Tiba Edlî du caran rapora “dikare li girtîgehê bimîne” daye Karsu. Di hevdîtina dawî ya ku bi telefonê bi dayika xwe re pêk anî de, got, “Eger tiştek bi serê min were, berpirsyar ev bijîjk in.”
Botan Karsu piştî hate girtin, di dosyaya têde hatî darizandin de destpêkê cezayê heta hetayê stand û ewilî li Girtîgeha Girtî ya Amedê ma. Piştî demek kurt sirgûnê Girtîgeha Girtî ya Ewlekariya Bilind a Wanê hate kirin. Botan Karsu beriya were sirgûnkirin zanî ku li Amedê nexweşê penceşêrê ye.
Karsu ji ber nexweşiya xwe gelek caran nerehet dibe û gelek dermanan bi kar tîne. Bi desteka hevalên xwe yên qawîşê jiyana xwe didomîne. Di hevdîtina dawî ya ku bi telefonê bi dayika xwe re pêk anî de, pirsgirêkên jiyan dike yek bi yek anî ziman.
Têkildarî mijarê em bi dayika wî Vahîbe Karsu re axivîn. Vahîbe Karsu herî dawî roja Şemiyê bi kurê xwe re axivî û rewşa wî ya dawî bi van gotinan ragihand: “Tevî ku kurê min gelek caran daxwazname jî daye, wî nayînin Amedê. Li Wanê bi rengekî têrker nayê tedawîkirin.”
Vahîbe Karsu ev tişt jî got, “Wî got, li nexweşxaneyê zêde pê re eleqedar nabin. Di hevdîtina dawî ya bi telefonê de ji min re got, ‘eger tiştek bi serê min were, berpirsyar ev bijîjk in’. Ez dixwazim bila wî berdin, eger neberdin jî bila car din sewqî Amedê bikin. Divê hemû girtiyên nexweş bên berdan.”
Têkildarî mijarê parêzerên Botan Karsu bi bîr xistin ku Saziya Tiba Edlî du caran ji bo Karsu rapora “dikare li girtîgehê bimîne” daye û diyar kirin ku serlêdanên wan ên ji bo taloqkirina înfazê jî, du caran hatine redkirin. Parêzeran ragihandin ku hîna bersiva serlêdana wan a dawî jî nehatiye dayîn û destnîşan kirin ku Karsu li girtîgehê ji ber pirsgirêkên tenduristiyê zehmetî jiyan dike.
