Di pêvajoya heşt mehan a ku bi ser banga dîrokî ya Rêber Apo a 27’ê Sibatê de çû de, Tevgera Azadiya Kurdistanê gava duyemîn a mezin avêt û israra xwe ya aştiyê careke din nîşan da.
PKK’ê ku piştî banga Rêber Apo Kongreya xwe ya 12’emîn kom kir û fesix kir, piştî demeke kongreyê di 11’ê Tîrmehê de komeke gerîlayan çekên xwe şewitandin û cidîyeta xwe ya li hemberî pêvajoyê nîşan dan.
Piştî bangê 8 meh şûnde, Tevgera Azadiya Kurdistanê ragihand ku li gorî biryarên Kongreya 12’emîn û bi erêkirina Rêber Apo, biryara vekişîna ji qada Tirkiyeyê destpê kiriye û gerîla derbasî Herêmên Parastinê yên Medyayê bûne.
‘TEVGERA AZADIYÊ BER BI AZADIYÊ GAVEKE DIN JÎ AVÊT’
Serokê Giştî yê Partiya Tevgera Kedê (EHP) Hakan Ozturk, vê gava Tevgera Azadiya Kurdistanê ji ANF’ê re nirxand.
Ozturk anî ziman ku biryara vekişîna PKK’ê ji Tirkiyeyê dewama pêvajoyê ye û bilêv kir ku bi vê gavê re rêya ber bi aştiyê vebûye û wiha got, “Ragihandina PKK’ê ya vekîşîna ji Tirkiyeyê, dikare wekî dewama pêvajoyê bê dîtin. Ev daxuyanî ji beriya her tiştî divê wekî encama mantiqa ku di navbera Rêber Apo û Tevgera Azadiyê de pêk hatiye, bê dîtin. Girêdayî vê, divê ji aliyê hemû aliyên siyasî yên Tirkiye û cîhanê ve erênî bê nirxandin.
Bi vê geşedanê re, Tevgera Kurd piştî biryara fesixê û şewitandina çekan bi awayekî sembolîk, gavekî din ber bi aştiyê ve avêt. Ev gavekî ku ji bo pêşveçûna pêvajoya aştiyê, derfetan zêde dike. Ji ber ku rêya ber bi aştiyê re avêt, divê pir hêja were dîtin.
Ji bo nirxandina helwestekî wiha bi awayekî erênî, divê hikûmetê vê li ber çavan bigire û ji bo pêkanîna pêwîstiyê vê hewldanê nîşan bide. Divê ev helwest bi tu şêweyî neyê îhmalkirin.
‘JI BER POLÎTÎKAYÊN DERENGXISTINÊ YÊ DESTHILATDARIYÊ ENCAMÊN BAŞTIR NEHAT GIRTIN’
Ozturk destnîşan kir ku daxuyaniyên ewil ên desthilatdariyê erênî ye û got ku ji ber polîtîkayên derengxistinê yê desthilatdariyê encamên baştir nehat girtin û wiha got: “Di vê çarçoveyê de li gorî di daxuyaniyên wan ên ewil de tê dîtin, di aliyê desthilatdariyê de nêzîkatiyeke ku geşedanê erênî dibîne heye. Ev pêvajo dikarîbû enamên baştir bigire û pêşve biçe. Lê tevî ku ji aliyê Tevgera Kurd ve gav hatin avêtin jî desthilatdariyê li hemberî van gavan vebûnên demokratîk nekir; vê jî pêvajoyê dereng xist. Her tişt ji ber ku desthilatdariyê tu vebûnên demokratîk û hiqûqî nekir, kilîd bû.
‘TU WATEYA DESTHILATDARIYÊ YA DI ISRARA NEAVÊTINA GAVAN DE NEMA’
Oztruk destnîşan kir ku bi gavên dawî yên Tevgera Azadiya Kurdistanê re, domandina israra Tirkiyeyê ya ji bo neavêtina gavan, zehmet bûye û wiha got: “Bi ragihandina ku PKK’ê ji Tirkiyeyê vekişiyaye, êdî pir zehmet e ku desthilatdariyê israra xwe ya ji bo neavêtina gavan bidomîne. Geşedan li pêşiya hemû welat û cîhanê rû didin. Başkirinên ku heta îro soza pêkanîna wan hatiye dayîn an jî mijara gotinê ne, divê neyên îhmalkirin. Raya giştî, gelê Kurd û hemû muxalefetên civakî, wê zextên xwe yên di vî aliyê de zêde bikin.”
Hakan Ozturk anî ziman ku êdî pêvajo wê li gorî gava ku desthildariyê biavêje şêwe bigre û got ku wê bi gava ku desthilatdariyê biavêje re pêvajo pêşve biçe.
Oztur herî dawî ev tişt gotin: “Girêdayî van şert û mercan hemû, di wê baweriyê de me ku wê ev helwesta PKK’ê hêviyan zêde bike û encaman biafirîne. Her tişt wê bi bersivdayîna gavên ku Tevgera Kurd avêtiye re şêwe bigire.”
