Pêngava 15’ê Tebaxê ku bi pêşengiya fermandarê mezin Egîd (Mahsûm Korkmaz) hate destpêkirin ji bo gelê Kurd bû vejîneke mezin. Bi vê pêngavê re gelê Kurd nîşan da ku êdî bêçare û bêxwedî nîne. Fermandar Egîd di parastina hebûna gelê Kurd de deriyekî nû vekir û ji vî alî ve bû sembola gerîlatiya li Kurdistanê.
Gerîlaya YJA Starê Rehşan Baran di salvegera 42’emîn de li ser Pêngava 15’ê Tebaxê nêrînên xwe anî ziman. Gerîlaya YJA Starê Rehşan Baran bi bîranîna fermandar Egîd dest bi axaftina xwe kir û got, “Bi pêkhatina Pêngava 15’ê Tebaxê re îro destketiyên gelekî mezin hatin bidestxistin. Têkildarî 15’ê Tebaxê çi bê gotin jî wê kêm bimîne. Ji ber ku bi saya vê pêngavê em gihîştin vê astê. Di şexsê hevalê Egîd de pêşketinên çêbûn bandor li ciwanan û gel kir û kir ku tevlîbûneke xurt li nava refên gerîla çêbibe. Bi rastî jî wê demê gelê Kurd di bin zext û êrişên giran de bû. Lê belê tevgera ku Rêber Apo ava kir û Pêngava 15’ê Tebaxê ya ku fermandar Egîd pêk anî, ji bo azadiya gelê Kurd gavên mezin da avêtin. Bi Pêngava 15’ê Tebaxê re gelê me fêhm kir ku êdî xwedî hêzeke parastinê ye.
Weke gelê Kurd me êdî karîbû qala hebûna xwe bikin. Hevalê Egîd ev yek di nava gelê Kurd de afirand. Hevrê Egîd bi kesayetiya xwe ya Apoyî di nava gelê Kurd de hat hezkirin. Armanca hevalê Egîd çi bû? Kesayetiyekî çawa di şexsê xwe de ava kiribû? Bi kurtasî ya girîng ew e ku em ê çawa nirxê ku fermandar Egîd ji me re hişt bilind bikin û xwedî lê derkevin. Divê gelê me zanibe ku êdî ti astengî li pêşiyê nîne. Divê em girîngî û wateya vê rojê zanibin; divê em zanibin bê 15’ê Tebaxê ji bo me tê çi wateyê. Ji ber ku vê pêngavê hebûna Kurdan danî holê. Em ê armanca hevalê Egîd a di vê pêngavê de bi têkoşîna xwe bi ser bixînin. Di şexsê Rêber Apo de em gihîştin vê astê. Divê em têkoşîna xwe hîn mezin bikin û di asta xweparastinê de gavên mezin biavêjin. Bi vê wesîleyê ez careke din Cejna Vejînê li Rêber Apo, gelê me û hevrêyan hemûyan pîroz dikim.”
