Li Civata Giştî ya Meclîsa Tirkiyeyê, nirxandinên li ser Pêşnûme Qanûna Budçeya Rêveberiya Navendî ya sala 2026’an dewam dikin. Gulistan Kiliç Koçyîgît li ser mijarê mafê axaftinê wergirt û anî ziman ku bi budçeyên AKP’ê re ku 24 sal in li ser desthiltadariyê ye, pirsgirêkên bingehîn ên gel nehatine çareserkirin. Gulistan Kiliç koçyîgît got, “Ji mûçeyê kêmtirîn heta bi teqawîtan, ji jinan heta bi cotkaran, ji dikandarên biçûk heta bi mamosteyên nayên tayînkirin ji bo çareserkirina pirsgirêkên civakê hûn hîn çend budçeyan, çend salên din dixwazin?”
Koçyîgît bal kişand ser rêjeya bacê ya ku di nava tevahiya salê de bê komkirin û diyar kir ku welatî di her kêliyê de bi sed hezaran lîre bacê didin, enflasyona rasteqîn li mitbexê û bazarê ye. Gulistan Kiliç Koçyîgît her wiha işaret bi newekheviya hatineyê ya li Tirkiyeyê kir û anî ziman ku cotkar di nava deynan de ne, para ji budçeyê tê veteqandin ne ji bo çandiniyê lê ji bo çekê tê bikaranîn.
Gulistan Kiliç Koçyîgît qala budçeya Wezareta Wekheviya Civakî û Kar jî kir û destnîşan kir ku para ji bo xurtkirina jinan tê veqetandin gelekî kêm e. Koçyîgît got, “Ev yek wêneyekî cihê şermê ye” û ragihand ku ji ber kêmaniya budçeya ji bo stargehên jinan tê veqetandin, kuştina jinan zêde dibe.
Serokwekîla Koma DEM Partiyê Gulistan Kiliç Koçyîgît diyar kir ku budçe li ser bêedaletî û newekheviyê hatiye avakirin û got, Elewî û Kurd bi salan e mexdûrê sîstema yekperest in.
‘CIHÊ ÇARESERIYÊ MECLÎS E’
Gulistan Kiliç Koçyîgît qala pêvajoya Aştî û Civaka Demokrtaîk û çareseriya pirsgirêka Kurd jî kir û destnîşan kir ku avakirina Komîsyona Demokrasî, Xwişk-Biratî û Piştevaniya Mîllî gelekî girîng bû. Gulistan Kiliç Koçyîgît hevdîtina heyeta komîsyonê ya bi Rêber Apo re weke “gaveke dîrokî” pênase kir û hemû aktorên siyasî yên keda wan di vê mijarê de hene pîroz kir.
‘DIVÊ EM BI HEV RE ÇARESER BIKIN’
Gulistan Kiliç Koçyîgît anî ziman ku jiyana bi hev re tenê bi afirandina çareseriya bi hev re dibe û navnîşana çareseriyê jî Meclîs e. Gulistan Kiliç Koçyîgît diyar kir ku çareseriya siyasî ya pirsgirêka Kurd wê bibe demokratîkbûna Tirkiyeyê û ev yek jî bi demokrasî û azadiyê dikare pêk were.
Serokwekîla Koma DEM Partiyê ragihand ku pêwîstî bi peymaneke nû ya civakî ya li ser bingeha mafên mirovan heye û di vê mijarê de perwerdeya bi zimanê dayikê, demokrasiya xwecihî ya xurt, bidawîkirina rejîma qeyûm, wekheviya zayendî û dadgeriya serbixwe destnîşan kir. Her wiha destnîşan kir ku aştiya mayinde û jiyana hevpar divê bi rengekî hiqûqî bê garantîkirin.
‘DI BIN BERPIRSYARIYA DEWLET Û DESTHILATDARIYÊ DE YE’
Gulistan Kiliç Koçyîgît anî ziman ku pêvajoya bi banga Rêber Apo destpê kir, bi serdana komîsyonê ya li Îmraliyê derbasî qonaxeke din bû û got, “Avakirina pêwîstiyên hiqûqî yên vê pêvajoyê di bin berpirsyariya dewlet û desthilatdariyê de ye.”
