Sibeha 14’ê Gulanê li bajarê Koln ê Elmanyayê baran dibarî. Li dora nîvro, carinan bahoz jî hebû. Lê, ber bi êvarê ve hewa aram bû. Her ku dema konsera Hozan Şemdîn nêzîk dibû, dinya baştir bû. Ewr belav bûn, hewaya sar winda bû û bayekî pir nermik destpê kir.
Konsera Hozan Şemdîn li salona Kulturbunkerê hate lidar xistin. Demjimêr bû 18:00 û muzîkhêzan der û dora Kulturbunkerê tije kirin. Di serî de endamên Koma Berxwedanê, stranbêj û muzîkjenên Kurd ên li eyaleta NRW’ê û bi sedan muzîkhêz beşdarî konserê bûn. Hola bi 250 kursiyan tijî bû û dibe ku du qat zêdetir mirov li ser lingan û derve man.
Konsera Hozan Şemdîn saet 20:00’an destpê kir. Yasîn Boyrak xêr hatina mêvanan kir û pêşî sînevîzyona Farûk Sakik hate nîşandan. Sînevîzyon, li ser jiyan û berhemên hunerî ya Hozan Şemdîn bû. Sakik sînevîzyonek têr û tije amade kiribû. Muzîkhêzan bi bêdengî li sînevîzyonê temaşe kirin û di dawiya sînevîzyonê de bi hezkiriyek mezin çepik lêxistin û tilîlî lîlandin.
MUZÎKJENÊN KONSERÊ
Piştre Yasîn Boyraz yek bi yek muzîkjenên konserê vexwendin ser dike. Li konserê hevkarên Hozan Şemdîn ev bûn: Yasîn Boyraz (Amûrên Bayî), Alî Îkîzer (Tembûr), Mazlûm Rewşen (Gîtar), Mûrat Bakrak (Perkusyon), Memo Yapiştiran (Ud û tembûr) û Ozan Olgûn (Amûrên Bayî).
Dema ku muzîkjenan cihê xwe girtin vêca Yasîn Boyraz, Hozan Şemdîn vexwend ser dikê.
KONSERÊ DESTPÊ KIR
Hozan Şemdîn bi muzîkek zindî derket ser dike û hat pêşiya guhdaran û ev stran pêşkêş kir: “Destûr nadim naxwazim / Axa me nabe pêşkêş / Bi sond û peyman / Hey Kurdistan / Welatê Kurdan / Hêlîna şêran / Tu her bijî / Serbixwe azad.” Dema ku stran qediya muzîkhêzan bi deqeyan bi dengê çepik û tilîliyan salon hejandin.
Hozan Şemdîn xêr hatina hemû mêvanan kir û got: “Em konsera xwe di nav meha Gulanê de lidar dixin. Gulanê meha şehîdan e. Em hemû şehîdên Kurdistanê bi bîr tînin. Dîsa sibê roja zimanê dayikê ye. Vê mehê Amedspor jî bû şampiyon. Li gelê me pîroz be. Dibe ku cihê me teng be lê bila dilê me fireh be. Hûn bi xêr hatine û ser seran û ser çavan hatine.”
Konsera Hozan Şemdîn du beş bûn û bi giştî sê saetan ajot. Mamoste, têr û tije nêzî 20 stran pêşkêşî guhdaran kir. Di nav de hem stranên dengbêjî hebûn û hem jî stranên wekî “Dayê”, “Hezar Hezar”, “Lê Amedê” û hwd. hebûn.
Hozan Şemdîn piştî her stranek axaftinek jî kir. Axaftinên Hozan Şemdîn li ser çand, huner, kevneşopî, ziman û dengbêjiyê bûn. Wekî mînak, ji bo dengbêjiyê got: “Dengbêjî stûna çanda Kurdî ye. Dagirkeran bi hezaran stranên me birin lê wan nekarî stranên dengbêjiyê wergerînin ser zimanê xwe.”
SPASIYA STÊRK TV
Di konserê de, bi dehan kesan, ku piraniya wan zarok û dayik bûn, guldesteyên gul dan Hozan Şemdîn. Li ser navê Stêrk TV’yê Rojnamevan Geşbûn Kara jî beşdarî konserê bû û wê jî guldesteyek pêşkeşî Hozan Şemdîn kir.
Hozan Şemdîn di navbera 1998 û 2018 di nav weşanên Med TV, Medya TV, Roj TV û Stêrk TV’yê bernameyên dengbêjiyê amade kir.
Hozan Şemdîn got: “Sala 95’an dema ku televîzyon ava bû em matmayî man. Me got Kurd û televîzyon. Lê îro şikûr bi sedan televîzyonên Kurdî hene.”
Geşbûn Kara jî axivî û got: “Ez çil saliya hunerî ya Mamoste pîroz dikim. Em gelek kêfxweşin ku tu bû mêvanê ekranên me. Em gelek kêfxweşin ku em bi stranên te mezin bûn û em bûn xwediyê dengbêjiya te. Em spasiya te dikin, ji bo keda te ya di nav çapameniya azad de.”
ŞANOYA AMELE Û DUETA CEWAD MERWANÎ
Hozan Şemdîn di nav konserê de stranên gelerî jî gotin. Yek ji wan “Ka Bûka Min” bû ku stranek ji herêma Serhedê ye. Hozan Şemdîn ev stran bi dehan sal berê li ser kaseta xwe gotibû û navê kaseta sêyemîn jî “Ka Bûka Min” e.
Lê doh bi şev taybetmendiya vê stranê ji bo guhdaran cuda bû. Ji ber ku vê stranê Mamoste Amele û Hozan Şemdîn wekî lîstikek şano bi hev re gotin.
Di nav konserê de cihekî herî balkêş jî dueta Hozan Şemdîn û Cewad Merwanî bû. Bi hev re beşek ji destana “Metran Îsa” gotin. Her du stranbêjan li gorî stîla xwe stran pêşkêş kirin. Civat germ bû û bayê dengbêjiyê di nav hola konserê de geriya. Di nav konserê de Hozan Şemdîn û Narînxanê jî stranek gelerî bi hev re gotin.
Du hezkiriyên Hozan Şemdîn, ku navê wan Şahîn û Zeynel bûye, ji bo konserê kar kirine. Sponsor kom kirine û bîlet belav kirine. Hozan Şemdîn, Şahîn û Zeynel vexwendin ser dikê û spasiya wan kir. Şahîn û Zeynel jî axivîn û ji bo keda wî spasiya Hozan Şemdîn kirin.
XELATA SPASIYÊ
Xeberê Hozan Şemdîn tune bû lê TEV-ÇAND û Koma Berxwedanê ji bo Hozan Şemdîn plakata “Spasi”yê amade kiribûn. Ji ber ku Hozan Şemdîn di sala 1986an de yekemîn kaseta xwe derxistibû. TEV-ÇAND û Koma Berxwedanê xwestin ku 40 saliya hunerî ya Hozan Şemdîn li ser dikê pîroz bikin.
Di nav konserê de bi navê TEV-ÇANDê Sinan Asya û bi navê Koma Berxwedan jî Xelîl Xemgîn vexwendin ser dikê. Herdu bi plakatan hatin ser dikê. Sinan Asya û Xelîl Xemgîn axaftinên kurt kirin û 40 saliya hunerî ya Hozan Şemdîn pîroz kirin û li ser navê sazî û komê spasiya Hozan Şemdîn kirin.
Piştî xelatdayînê Hozan Şemdîn jî spasiya TEV-ÇAND û Koma Berxwedanê kir û got: “Hevalê Mehmet Xeyrî Durmuş gotibû: ‘Li ser kevirê gora min binivîsin: Ew di nav deynan de mir.’ Em çiqas kar bikin jî kêm e. Em deyndarê şehîdên xwe, gelê xwe û welatê xwe ne.”
Konsera Hozan Şemdîn di derengiya şevê de bi dawî bû.
