Komeleya Hiqûqnasên Ji Bo Azadiyê (OHD), Komeleya Mafên Mirovan (ÎHD) û Baroya Mêrdînê rapora xwe ya li ser binpêkirinên mafên mirovan ên li Mêrdîn û navçeyên wê de ku di dema êrişên li ser Helebê û Rojavayê pêk hatin, weşandin. Daxuyanî li Baroya Mêrdînê hat dayîn. Seroka Navenda MAfên Jinan a Baroya Mêrdînê Seher Acayê raporê eşkere kir. Seher Acayê diyar kir ku ji 6’ê Çileyê ve hêzên ewlehiyê bi awayekî nehevseng û zextkar mudaxileyî xwepêşandanên aştiyane yên ku armanc dikin balê bikişînin ser Rojavayê kirine, mafê civîn û xwepêşandanê bin pê kirine.
Li gorî raporê, 85 kes hatine binçavkirin, 13 kes hatine girtin, 19 kes bi kontrola edlî serbest hatine berdan û 10 kes hê jî di binçavan de ne. Di dema binçavkirinan de pêkanînên wekî kelepçekirina berevajî, lêdan, kaşkirina bi erdê ve û di sermayê de şilkirin û sekinandin hatine pêkanîn. Hat ragihandin ku zarok, jin û nexweş jî bi tundûtûjiyê re rû bi rû mane ku di hin bûyeran de birîndariyên giran çêbûne.
Di raporê de hat destnîşankirin ku kesên di binçavan de bi zexta derûnî re rû bi rû mane; wekî heqaret, gef, gotinên biçûkxistinê yên li ser bingeha nasnameya etnîkî û siyasî û maçkirina bi zorê ya alayê. Hat destnîşankirin ku mafê tenduristî û parastinê yê kesên hatine binçavkirin, hatine binpêkirin. Rêxistinan daxwaza lêpirsîneke serbixwe, tedbîr li dijî berpirsiyaran û serbestberdana kesên hatine binçavkirin kirin.
