Îro, 11ˊê Cotmeha 2025ˊan, salvegera 10ˊemîn a damezrandina Hêzên Sûriya Demokratîk (QSD) ye, bi vê boneyê Rêveberiya Xweseriya Demokratîk a Herêma Bakur û Rojhilatê Sûriyeyê daxuyaniyek da. Rêveberiya Xweser di daxuyaniya xwe de ev bone li malbatên şehîdan, şervan û fermandarên QSDˊê û li tevahî gelê Bakur û Rojhilatê Sûriyeyê pîroz kir.
Daxuyaniya Rêveberiya Xweser wiha ye:
“Bi boneya salvegera dehemîn a damezrandina QSDˊê, wekî Rêveberiya Xweseriya Demokratîk a Herêma Bakur û Rojhilatê Sûriyeyê bi rêz û hurmeteke mezin şehîdên di oxira axa welat de canê xwe dayne bi bîr tînin. Bi fedakariya şehîdan herêm ji terorê hat rizgarkirin, ewlehî û aramî misoger bû. Em vê boneyê li malbatên şehîdan, şervan û fermandarên QSDˊê, li tevahî gelê xwe yê li Bakru û Rojhilatê Sûriyeyê pîroz dikin.
QSDˊê di demekê de êrişên terorîsta cîhanî ya bi nûnertiya rêxistin DAÎŞˊê mezin dibûn û gef li tevahî mirovahiyê dixwarin, di qonaxeke zehemet ku Sûriye û herêmê tê re derbas dibû de hat damezrandin. Ji nava wan şert û mercan, ev hêz ji keç û xortên herêmê bi hemû pêkhateyên wê hat avakirin, da ku bibe modela yekitiya gelan û hevgirtina li hember tundrawî û terorê.
Di demekê de gelek dewlet û hêzan nikarîbû rêxistina DAÎŞˊê têk bibira, QSDˊê roleke stratejîk di têkbirina wê ya erdnîgarî de lîst. Van hêzan, ne tenê ji bo Bakur û Rojhilatê Sûriyeyê lê ji bo tevahî mirovahiyê, fedakariyên mezin di parastina nirxên mirovahî, azadî û rûmetê de dan.
Îro, bi derbasbûna 10 salan di ser damezrandinê re, Rêveberiya Xweseriya Demokratîk diyar dike ku dem hatiye ku QSDˊê cihê xwe yê layiq mafdar di artêşa nû ya Sûriyeyê de, weke hêzeke neteweyî ku welat û yekitiya wê diparêze û xwestekên gelên wê yên demokrasî, edalet û wekheviyê îfade dike, bigire.
Di dawiyê de em careke din vê munasebeta dîrokî li QSDˊê, şervan û fermandarên wê, li tevahî gelê xwe pîroz dikin û diyar dikin ku em piştgiriya xwe ji bo van hêzên ku sembola fedakarî û dilsoziyê ne, didomînin.”
