Rêveberiya Xweseriya Demokratîk a Herêma Bakur û Rojhilatê Sûriyeyê têkildarî êrîşên komên girêdayî hikûmeta demkî yên li dijî taxên Şêxmeqsûd û Eşrefiyê yên Helebê li ser malpera xwe daxuyanî da.
Di daxuyaniyê de hat destnîşankirin ku acizbûna pêşketina leşkerî ya van koman hişt ku bi awayekî zanabûnê, çekên giran ji tank û topavêjan li dijî taxên şêniyan, nexweşxane û binesaziyan bi kar bînin. Bi vê yekê tevahî pîvan û qanûnên mirovî û navneteweyî bin pê dikin.
Rêveberiya Xweser di daxuyaniya xwe de anî ziman ku hedefgirtina dubare ya nexweşxane û navendên tenduristiyê li taxên Şêxmeqsûd û Eşrefiyê ne kiryarekî leşkerî ye, kiryarekî bi zanabûn a bi armanca feclbûna jiyana wan taxan û mehrûmkirina şêniyan ji mafên dermankirinê ye.
Di daxuyaniyê de hat destnîşankirin ku berdewama van sûcan û binpêkirinên xeternak nîşaneya pêkanîna komkujyan li dijî welatiyan e. Ev êriş dikevin xana sûcên şer û qirkirina komî, nemaze li gel beşdariya komên DAÎŞˊê dike.
Rêveberiyê di daxuyaniya xwe de dewleta Tirk a dagirker rasterast berpirsiyariya van sûcan dît û destnîşan kir ku dewleta Tirk, bi armanca tevliheviya aramî û derbekirina vîna gelên azad, piştgiriyê dide van koman.
Rêveberiya Xweser berxwedana mezin û biçûkên taxên Şêxmeqsûd û Eşrefiyê û lehengên Hêzên Ewlekariya Hundirîn li dijî dijminê hov silav kir û got hûn destanên berxwedanê dinivîsin.
Rêveberiyê bang li tevahî pêkhateyên Sûriyeyê, gelên azad û hêzên demokratîk li cîhanê jî kir ku li xelkê Şêxmeqsûd û Eşrefiyê xwedi derbikevin. piştgiriyê bidin berxwedana wan a rewa li dijî van êrişan û helwesteke cidî û zelal nîşan bidin.
Rêveberiya Xweser bang li civata navneteweyî, tevahî rêxistin, saziyên navneteweyî û mirovî kir ku bi lez destwerdanê bikin, van binpêkirinan dawî bikin, rê li ber sûcdaran bigirin, wan li gorî qanûna navneteweyî ceza bikin, nehêlin deverên niştecihan topbaran bikin û komkujiyên li dijî gel pêk bînin.
Di dawiya daxuyaniyê de Rêveberiya Xweser kesên di oxira parastina xak û rûmeta gelê xwe de şehîd bûne bi bîr anî, soza şopandina rêça wan kir, şîfaya lezgîn ji birîndaran re xwest û sersaxî da malbatên şehîdan û got vîn û berxwedan ji tevahî hewldanên qirkirinê û êrîşan bi hêztir e.
