Berdevkê Kremlînê Dmitriy Peskov ragihand ku Rûsya dê ji nîvê şeva 8’ê Gulanê û pê ve li Ukraynayê ji bo du rojan agirbesteke yekalî pêk bîne. Hat diyarkirin ku agirbest ji ber salvegera serkeftina Yekîtiya Sovyetê ya li dijî Elmanyaya Nazî ya sala 1945’an hatiye ragihandin.
Lê belê Volodimir Zelenskiy parast ku Rûsya di mijara agirbestê de ne jidil e. Zelenskiy di ser Telegramê re daxuyaniyek da û diyar kir ku di nava rojê de li dijî Ukraynayê nêzî 100 êrîşên bi firokeyên bêmirov (AHB) û bi dehan êrîşên hewayî hatine kirin.
RÛSYA LI SER DÎPLOMASİYÊ BI CIDÎ NAFIKIRE
Zelenskiy anî ziman ku di êrîşan de bi taybetî binesaziya sivîl a li herêmên Harkîv, Sumî, Donetsk û Xersonê hatine armancgirtin. Zelenskiy got ku binesaziya rêhesin û enerjiyê jî hatiye lêdan û wiha pê de çû: Ev rewş nîşan dide ku Rûsya agirbestê bi cidî nanirxîne.
Rêberê Ukraynayê angaşt kir ku armanca bingehîn a rêveberiya Moskovayê ew e ku di dema merasîmên 9’ê Gulanê de li derdora Qada Sor bêdengiyeke demkurt peyda bike.
KÎEV: RÛSYA ÊRÎŞÊN XWE DIDOMÎNE
Rêveberiya Kîevê berê ragihandibû ku wan ji roja çarşemê û pê ve biryara agirbestê girtiye. Lê belê aliyê Ukraynayê diyar kir ku Rûsyayê bi domandina êrîşên xwe ev hewldan red kiriye.
Zelenskiy destnîşan kir ku Ukrayna dê bi heman rengî bersiva êrîşan bide û got; heke Rûsya di warê dîplomasiyê de gavekê biavêje, Kîev jî dê riya dîplomatîk bişopîne.
