Çiyayê Qendîlê ji bo berxwedaniya gelê Kurd, di dem û cihên cûda de malûvanî ji gelek têkoşîn û şoreşgeran re kiriye. Ta roja îro jî ala serfiraziya gelê Kurd, di destê Qendîlê de ye.
Yek jî bûyera girîng ku Çiyayê Qendîlê şahidiya wê kiriye, şahadeta pêşengên PKK’ê Mehmet Karasûngur (Xalid) û Îbrahîm Bîlgîn (Seîd) e.
Beriya 43 salan, di 2’yê Gulana 1983’yan de ew her du pêşeng şehîd bûn. Di demekê welê de ku li herêma Qendîlê di navbera YNK û eniya PDK-Partiya Komînîst de şerekî dijwar rû dida, Endamê Komîteya Navendî yê PKK’ê Mehmet Karasûngur, da ku dawî li şerê di navbera van partiyan de bîne, li ser erkdarkirina partiya xwe li gel 3 hevalên xwe derbasî Qendîlê bû.
Di demêkê li gundê Lewcê danûstandinên xwe li gel Partiya Komînîst pêk dianîn û hewildan didan ku bi YNK’ê re jî hevdîtin bikin de, li vê herêmê şer gûr bû û neçar man ku her du heval biçin qadeke cûda. Li pala çiyayên Bakurê gundê Bolê û Stêrokan, di pevçûnan de herdu pêşeng şehîd bûn.
Di dema şehadeta wan de kesekî welatparêz ê bi navê Şêx Omer li nêzî cihê şehîd bûne, cenazeyên wan hildigre û li goristana gundê Bergirkê defin dike. Di sala 2001’an de cenazeyan radestî gerîlayên PKK’ê dike û bi merasîmeke bi heybet li Pakrawangeha Şehîd Mehmet Karasûngur tên veşartin.
Piştî wê cenazeyên bi sedan şehîdên PKK’ê li vê pakrewangehê tên veşartin. Her wiha gora gelek pêşengên PKK’ê jî li ser wasiyeta wan di Pakrewangeha Mehmed Karasûngur de cih digrin. Ew goristan ji bo hevalên wan şehîdan û gelê welatparêz ê çar parçeyên Kurdistanê bûye mabed û pîrozgehek.
Şêx Omer ku şahîdiya wan rojan kiriye, cara yekê li cihê ku ew her du pêşengên Tevgera Azadiyê lê şehîd bûne û cenazeyên wan girtiye, ji ajansa me re axifî.
Şêx Omer destnîşan kir di sala 1983’yan de li herêma Qendîlê şerekî dijwar û wêranker qewimî û Rêber Apo da ku vî şerî bide sekinandin şandeyek ji hevalan pêk tê şande herêmê û wiha domand: “Ew şandeya ku ji 4 hevalan pêk dihat ji Xakûrkê hatin û derbasî maleke li gundê Lewcê bûn. Wê şevê YNK’ê êrîşek anî ser herêmê da ku bi Partiya Komînst re şer bike. Dema ew şer li herêmê belav bû, ew cihê ku em niha lê ne jora me ji wan hevalan du kesên bi navê Mehmet Karasûngur û Îbrahîm şehîd bûn.”
Şêx Omer, anî ziman ku piştî YNK fêm dike ew herdu kesên jiyana xwe dest dane ji Partiya Karkeran e, bang li wî dikin ku cenazeyên wan rake û got, “Min jî cenazeyên herdu şehîdan li goristana gundê xwe Bergirkê defin kir. Piştî 18 salan min cenaze radestî hevalan kirin û ew birin qebristana şehîdan.”
Şêx Omer, balê dikşîne ser ku ew heval ji bo danûstandinan di navbera her du aliyan de bikin û yekîtiyekê di navbera partiyên Kurd de çêkin hatibûn herêmê, lê di armanca xwe de bi ser neketin û ta roja îro wekê gelê Kurd em êşa wê jiyan dikin.
Şêx Omer bang li hemû aliyan jî kir ku ji bo keda şehîdan vala neçe divê Kurd yekîtiya xwe çêkin û bi van gotinan dawî li axaftina xwe anî: “Kurd hemû yek in, dijminê me gelek in. Divê ev hêza me bibe yek û li hemberî dijmin bisekine. Divê li her çar parçeyên Kurdistanê, Kurd bibin yek.”
