Duh gelê Kurd û enternasyonalên ku piştgiriyê didin têkoşîna azadiyê ya jinê, li Rojava bi merasîmeke bîranînê hatin ba hev. Di şexsê şoreşgera Yewnan Elefteria Fortulaki, fermandara YPJ’ê Sîdar Efrîn, fermandara gerîla Emîne Erciyes û şervana azadiyê ya enternasyonalîst Tîjda Zagros (Kelly Freigang) de hemû şehîd hatin bîranîn.
Ji bo enternasyonalîsta Yewnan Elefteria Fortulaki ya ku dema 23 salî di 24’ê Adara 2006’an de li Atînayê bedena xwe da ber agir û deng da têkoşîna Kurdan, fermandara YPJ’ê Sîdar Efrîn a ku 18’ê Çileyê li Tebqayê şehîd bû, fermandara gerîla ya Tirkmen Emîne Erciyes ku sala 2020’an li çiyayên Kurdistanê şehîd bû û enternasyonalîsta Elman Kelly Feigang (Tîjda Zagros) a ku havîna 2025’an li Herêmên Parastinê yên Medyayê şehîd bû, li Goristana Şehîd Delîl Saroxan merasîma bîranînê hate lidarxistin.
Malbatên şehîdan, rêxistinên civakî yên sivîl, nûnerên partiya siyasî û gelek enternasyonalîst beşdarî bîranînê bûn.
Di axaftinan de bal kişandin ser polîtîkayên hêzên navneteweyî yên li herêmê û hate diyarkirin ku bîranînên bi vî rengî ji bo aştî û lêgerîna siberoja hevpar girîng e. Bavê şervaneke YPJ’ê got, “Ev bîranîn daxwaza aştiya hevpar a gelên cuda xurt dike.”
Enternasyonalîstek ji Spanyayê wiha got, “Rêber Apo ji bo bi pêvajoya aştî û civaka demokratîk tundiyê bişkîne û projeyeke wekheviyê pêşkêş bike, gaveke nû avêt.”
Di çarçoveya bîranînê de şanoyek hate pêşkêşkirin. Bi tevkariya komên “Gemeinsam Kämpfen (Têkoşîna Bi Hev Re)”, “Jin Rojava Diparêzin” û “Astare Arte” eleqeyek zêde nîşanî merasîmê hate dayîn.
Endamên Enstîtuya Andrea Wolf jî têkildarî efsaneya Şahmeran şanoyeke kurt pêşkêş kirin. Di merasîmê de peyamên bi dîmen ên malbatên Azad Şergeş ê Elmanyayî ku li çiyayên azad şehîd bû û Baran Sason ê Hollandayî ku li Dêrazorê di berxwedana li dijî çeteyan de şehîd bû, hatin parvekirin.
PEYAMÊN AŞTÎ Û YEKÎTIYÊ
Bîranîn bi bangên aştî û wekheviyê bi dawî bû. Dayika şervanê YPG’ê yê ku meha Çileyê di êrîşa hêzên Hikûmeta Demkî ya Sûriyeyê de şehîd bû, hestên xwe bi van gotinan anî ziman: “Daxwaza aştiyê ji parzemîn û sînoran wêdetir, mirovan dike yek. Ciwanên ku ji çar aliyên cîhanê hatine vir, nîşan didin ku em li ser rêya rast in.”
Piştî bîranînê beşdaran berê xwe da merasîma veşartina cenaze ya şervanê YPG’ê Karker Qamişlo.
