Li gorî agahiyên ku SOHRê parve kirine, hin endamên ser bi hêzên Hikûmeta Demkî û kesên ji gundên derdorê hatine, li gundên Çelebiyê û Xirab Hişkê malên sivîlan kirine hedef. Komên ku ji koçberkirina bi darê zorê û valahiya ewlehiyê ya li herêmê sûd werdigirin; kelûpelên malê, amûrên çandiniyê, ajal û stokên xwarinê talan kirin û hemû çavkaniyên debarê yên gundan ji nav birin.
Hate diyar kirin ku tevî ku bûyerên talanê di wan rojên ku li benda pêkanîna peymanê bûn de qewimîne jî, êriş nehatine sekinandin; ji ber zêdebûna aloziya leşkerî û bombebarana dijwar, rûniştvanên gundan neçar mane xwe li navenda bajarê Kobanê bigirin. Li gorî daxuyaniyê, sivîlên koçberbûyî keda bi salan, bîranîn û jiyana xwe li pey xwe hiştine.
SOHRê ragihand ku şert û mercên mirovî yên malbatên koçber ên ku li Kobanê di bin dorpêçê de dijîn her ku diçe girantir dibin, gihîştina pêdiviyên bingehîn hema hema bi temamî hatiye birîn û xizmetên giştî gihîştine xala sekinandinê. Hat destnîşankirin ku bi taybetî di nav zarok û kal û pîran de rîska xizanî û nexweşiyê bi awayekî cidî zêde bûye.
SOHRê diyar kir ku talankirina mal û milkên sivîlan ne tenê binpêkirina mafê milkiyetê ye, di heman demê de hilweşîna psîkolojîk û civakî ya gel kûrtir dike û hêviyên vegerê û avakirina jiyaneke nû ji holê radike.
Çavdêriyê bang li civaka navneteweyî û saziyên alîkariyê yên mirovî kir ku ji bo rakirina dorpêça li ser Kobanê, dabînkirina vegera ewle ya sivîlan û parastina mal û milkên gel li dijî talan û desteserkirinê, bi lezgînî bikevin tevgerê.
