“Tu bûyî dengê Zerdeşt
Kawayê Medyayê
Tu bûyî resmê Manî
Baxçê ronahiyê
Tu bûyî dengê Îsa
Çermixa Romayê”
Delîl Rênas Farqîn (Jehat Bagci) ku bi vê strana Hozan Serhad re berê xwe da çiyayan, agahiya şehadeta wî di van rojan de hate ragihandin. Delîl ê ku di nav 49 gerîlayên şehîd ên Amedê de bû, di sala 2015’an de pêşî li bajar û paşê li çiyayan têkoşîna xwe domand. Delîl ku di berxwedana xwerêveberiyê de jî cîh girt, paşê berê xwe da çiyayan. Têkoşîna wî ya li çiyayan, di 1’ê Mijdara 2019’an de li Garê bi şehadeta wî giha lûtkeyê.
Malbata wî ku agahiya şehadetê girt, bi malbatên din re taziyeya xwe li Parka Koşuyoluyê ava kir. Dayik Sevda Bagci, diyar kir ku piştî taziyeya ku sê rojan dom kir, hem ji malbatan hem jî ji gel cesareteke mezin girtiye û bi van gotinan Delîl bi bîr tîne: “Ew xebatkar bû, hiş û fikra wî her dem li çiyayan bû.”
Sevda Bagci, da zanîn ku kurê wê bi stranên Delîla û Bermal Çem mezin bûye û hem di zarokatiya xwe de hem jî di ciwantiyê xwe de gelek dihat hezkirin û got: “Ew dengê wan vedikir, guhdarî dikir û bi wî rengî radiket.”
‘DI HIŞ Û FIKRA WÎ DE HER DEM HÊVRÊYÊN WÎ HEBÛN’
Sevda Bagci, bi vî rengî behsa Delîl dike: “Ew herî pir ji doza xwe hez dikir. Delîl di bûyerên 2006’an de her dem li pêş bû, qet ranediwastiya. Min ji wî re digot ‘Here dibistanê, li ser dersên xwe bixebite’. Ew jî ji min re digot ‘Ew ciwanên me ne’. Digot ‘Ciwanên me hemû çûn, ez ji bo kê bixebitim’. Hiş û fikra wî her dem li gel hevrêyan bû. Ji stranên Delîla û Bermal pir hez dikir, her dem guhdarî dikir. Her dem ji min re digot ‘Çi dibe bila bibe, ez ê biçim’.
Di hundirê xwe de her tişt hîs dikir. Êvaran berî ku rakeve, videoyan vedikir, li dengê wan guhdarî dikir û wisa radiket. Hemû xewn û jiyana wî bi wan re bû.”
‘STRAN GOTIN Û ÇÛ’
Sevda Bagci, diyar kir ku zarokên xwe di nav gelek zehmetiyan de mezin kiriye û got: “Çar zarokên min hene. Piştî ku hevjînê min jiyana xwe ji dest da, min zarokên xwe di nav zehmetiyan de mezin kirin. Delîl ciwanekî xebatkar, bi xwe bawer û dilpak bû. Kîjan dayik bidîta yekser li ber wan serê xwe ditewand. Digot ‘Hemû dayik dayikên me ne’ û hem ji malbatan hem jî ji dayikan re hurmetek mezin nîşan dida. Ji ber ku her dem li wan difikirî, min jî fêm kir ku ew ê biçe. Ew bi gotina wan stranan çû.”
‘MALBAT Û GEL HÊZ DAN ME’
Sevda Bagci, piştî ku agahiya şehadetê girt tiştên ku jiyaye wisa vegot: “Piştî derketina qanûnê, min digot ew ê vegere, lê agahiya şehadeta wî hat. Wê rojê dema ku me bi dayikan re taziyeya hevpar ava kir, me hemûyan ji hev hêzeke mezin girt. Pêwîst e hemû taziye bi vê awayî bêne kirin. Divê ku tu malbat bi tenê nemîne. Ger wê rojê dayikan hêz nedaba min û min jî hêz neda wan, min nedikaribû ewqas bi hêz bisekiniya. Lê cesareta dayikan û wan dirûşmeyan ez li ser piyan hiştim.
Sê rojan bi piştgiriya gel û cesareta dayikan me li wir sersaxî qebûl kir. Her kesê ku dihat ji me re digot ‘Şehîdên me ne, şehîd namirin’. Gel pir xwedî derket û ev xwedîderketin morala me bilind kir. Di her dengê dirûşmeyê de me ji nû ve hêz digirt.”
‘TÊKOŞÎNA AŞTÎYÊ DIVÊ BERDEWAM BIKE’
Sevda Bagci diyar kir ku têkoşîna aştiyê ya ku Delîl meşandiye divê bê dewamkirin û ji bo vê yekê dê têkoşînê bikin û wiha domand: “Wan ji bo jiyaneke azad canê xwe da. Em ji îro şûnde dixwazin ku gel û zarok li ser axa azad bijîn. Bi vê çûyîn û têkoşîna wan re em ê hîn bi hêztir bibin û mîrasa wan berdewam bikin.”
‘ÊDÎ DIVÊ CENAZEYÊN NÛ NEYÊN’
Sevda Bagci, bal kişand ser wê yekê ku pêvajoya heyî divê pêş de biçe û her kes bê merc vegere û ev banga kir: “Xwîn bi xwînê nayê şûştin. Qanûn derket, piştî vê yekê divê gerîlayên ku li wir mane vegerin vir. Tenê daxwaza me dayikan aştî ye. Em naxwazin ku canê kesî biêşe. Êdî divê pevçûn çênebin. Canê gelek dayikan êşiya, gelek can çûn. Daxwaza me ya tenê bi salan e ku êdî cenaze neyên. Êdî divê ev mirov di nav aştiyê de bijîn.”
