Meena Keshwar Kamal di 27’ê Sibata 1956’an de li Kabul a Efganistanê ji dayik bû. Meena di jiyana xwe ya kurt lê bi bandorker de bû sembola têkoşîna ji bo mafên jinan, edaleta civakî û azadiyê. Ew ne tenê bû dengê jinên Efganistanê, di heman demê de bû dengê hemû gelên bindest.
PERWERDEHÎ Û LÊGERÎNA WÊ YA FIKRÎ
Meena li Kabulê dest bi xwendina xwe kir û li zanîngeha Kabulê zanistên siyasî xwend. Di sala 1977’an de ew hê 20 salî bû û yekem rêxistina serbixwe ya mafên jinan, Komeleya Şoreşger a Jinên Efganistanê (Revolutionary Association of the Women of Afghanistan RAWA) damezrand. Armanca RAWA’yê ew bû ku di nav jinên Efganistanê de hişyariya li ser kevneşopiyên baviksalarî yên feodal xurt bike û rê li ber têkoşîna li dijî her cure dagirkerî, zordestî û paşverûtiyê veke.
Meena ne tenê parêzvana mafên jinan bû; Li dijî emperyalîzm, paşverûtiyên olî û faşîzmê jî berxwedêrek bi biryar bû. Wê di sala 1979’an de li dijî dagirkiriya Sovyetê serî hilda. Her wiha li dijî komên îslamî û Talîbanê ku di salên piştre de li Efganistanê derketin holê jî rabû. Meena dibêje ku azadiya jinê ne tenê bi guhertina rejîmê pêk tê; bi têkoşîneke sîstematîk û gelêrî pêkan e.
SIRGÛNÎ Û TÊKOŞÎNA WÊ
Meena ku di tevahiya jiyana xwe de gelek caran gef lê hat xwarin, xebatên xwe derbasî kampên penaberan ên li Pakistanê kir. Li vir dibistan, navendên tenduristiyê û bernameyên hişyarkirina jinan birêxistin kir. Ji ber vê bi taybetî ji aliyê derdorên îslamî û komên alîgirên Sowyetê yên li Pakistanê ve weke metirsiyeke mezin hat dîtin.
DI 30 SALIYA XWE DE HAT KUŞTIN
Meena di sala 1987’an de hê di 30 saliya xwe de, li bajarê Quetta yê Pakistanê ji aliyê komên ku tê texmînkirin têkiliya wan bi komên Îslamî yên radîkal re heye, hat revandin û kuştin. Tê texmînkirin ku pêkhateyên wekî KHAD (servîsa veşartî ya ku Sowyetê piştgirî dide) û Hizb-i Islamî li Efganistanê li pişt vê kiryarê ne.
Bi mirina Meenayê re têkoşîn bi dawî nebû. RAWA’yê îro jî li gorî îdealên Meena tevdigere. Şopa Meena di her têkoşînek ji bo azadî, perwerde û mafên mirovan ên jinên Efganistanê de tê hîskirin.
Çavkaniya wêneyê: Wikimedia Commons
