Navenda Ragihandin û Çapemeniya Hêzên Sûriya Demokratîk (QSD) bi daxuyaniyekê ragihand ku Tîmên Operasyonên Leşkerî (TOL) ên girêdayî QSD’ê bi hevkariya Koalîsyona Navneteweyî li bajarê Reqayê operasyon pêk anî û şaneyeke terorîst a xeterank têk birin.
Di daxuyaniya QSD’ê de ev agahî hatin parvekirin:
“Hîna rêxistina DAÎŞ’ê ya terorîst hewl dide xwe vejîne û sûdê ji rewşa aloziya heyî wergire ku rêxistina xwe xurt bike, her wiha çavkaniyên leşkerî û mirovî yên nû werdigire û di êrîşên wê yên terorane yên li seranserî erdnîgariya Sûriyeyê de dibe alîkar. Lê hêzên me bi ser wan şaneyên terorîst ên ku xwe li herêmên me vedişêrin de digirin. Ew şane dema derfetê dibînin êrîşên terorane pêk tînin. Hêzên me endamên şaneyan digirin û pêşî li pêkanîna êrîşên wan ên terorane yên li dijî hêzên me yên leşkerî, sivîl û saziyan de digirin.
Tîmên TOL’ê yên girêdayî hêzên me îro (Duşem) li hundirê bajarê Reqayê operasyoneke ewlehiyê ya kontrolkirî pêk anî û şaneyeke xeternak a rêxistina DAÎŞ’ê ya terorane têk birin.
Piştî agahiyên têr û tije li ser tevger û xebata şaneya terorîst wergirtin û cihê wê diyar kir, hêzên me bi piştevaniya Hêzên Koalîsyona Navneteweyî bi ser maleke li bajarê Reqayê de girt. Ew mal cihê kombûn û belavbûna erkan di nava endamên şaneyê de ye. Hêzên me bi ser qaşo mêvanxaneyê de girt û serçeteyê şaneyê ‘Emîr’ ê bi navê Ebid Îd û bi nasnav Ebî Zehre û 4 çeteyên pê re girtin. Navên wan 4 kesan wiha ne: Hisên Mihemed (Ebî Meaz), Ebid El Yûsif (Ebî Hadî), Casim Salih (Şemerî) û Hemed El Xelef (Usama û Ebû Omer).
Şaneyê pêşwaziya çeteyên DAÎŞ’ê yên ji derveyî Reqayê dihatin, dikir û ew li nava şaneyên terorîst belav kirin. Her wiha endamên şaneyê yên ku hatine girtin cebilxane, teqemenî û madeyên lojîstîk ji bo pêkanîna êrîşekê li dijî girtîgeha Reqayê ku tê de girtiyên DAÎŞ’ê hene, peyda dikirin. Lê di encama girtina wan de ev plana êrîşê hat têkbirin.
Hêzên me diyar dike ku ew ê di operasyonên xwe yên ewlehî û leşkerî de ji bo derbekirina bingehên rêxistina terorîst, ziwakirina çavkaniyên wan ên madî û manewî de bidomînin. Xeteriya rêxistinê hîna heye, bi wê re divê hevkariyeke navneteweyî û xwecihî ya zêde hebe, ji ber ku ev rêxistin rewşa aloz û tevliheviya ewlehî ya li Sûriyeyê firset digire.”
