Tevgera Jinên Kurd a Fransayê (TJK-F), derbarê Gulden Komurcu ya ku li herêma Drancy ya Fransayê dijî û li navçeya Bazîda Agiriyê ji hêla hevjînê xwe Mehmet Komurcu ve li ber çavên zarokên wê hatibû qetilkirin, daxuyaniyeke nivîskî weşand. Di daxuyaniyê de hat diyarkirin ku qetilkirina jinan ji pergala baviksalar, polîtîkayên bêcezahiştinê û nêzîkatiyên zayendperest ên civakê hêz digire û hat gotin: “Em ê hesabê Gulden bipirsin.” TJK-F’ê banga têkoşîna hevpar li jinan kir û gelê welatparêz vexwend meşa ku dê di 25’ê Gulanê de pêk bê.
Daxuyaniya TJK-F’ê wiha ye: Gulden Komurcu ya ku li herêma Drancy ya Fransayê dijî, piştî ku çû bajarê xwe Bazîda Agiriyê, ji hêla hevjînê xwe Mehmet Komurcu ve li naverasta kolanê, li ber çavên zarokên xwe bi çekeke agirîn bi rengekî hovane hat qetilkirin. Em qetilkirina Gulden Komurcu bi hêrs û nefret şermezar dikin û diyar dikin ku em ê hesabê wê bipirsin.
Gulden Komurcu ya ku dayika pênc zarokan bû, di 13 saliya xwe de ji hêla Mehmet Komurcu ve hatibû revandin û bi darê zorê hatibû zewicandin; di 14 saliya xwe de bûbû dayik û bi salan rastî tûndûtûjiya hevjînê xwe hatibû. Gulden Komurcu, mînakeke herî berçav a zewaca zarokan e û îfadeya wê hişmendiyê ye ku jinê wekî ‘malê’ mêr dibîne. Qetilkirina Gulden careke din nîşan da ku tundiya nav malê û qetilkirina jinan li her derê jiyana jinan dixe bin rîskê.
Cihên ku jê re dibêjin ‘malbata pîroz’, ew der in ku jin tê de mehkûmî tundî û mirinê dibin. Pîrozkirina van cihan, ji serî de asayîkirina qetilkirina jinan e. Divê bê zanîn ku li cihê jin ne azad be, tu pîroziya wê derê nîn e û nabe.
Li dijî qirkirina jinan, beriya her tiştî rêxistinbûna jinan û pêşxistina parastina cewherî mijareke jiyanî ye. Civaka ku parastina jiyana xwe radestî kesên din bike, jiyana wê ne di ewlehiyê de ye. Ji ber vê yekê, parastina jinan bi rêya rêxistinbûna wan ve girêdayî ye. Her wiha hestiyariya civakê ya li dijî qirkirina jinan jî pir girîng e. Divê neyê jibîrkirin ku ‘bêdengî’, hevparîkirina sûc e.
Yek ji sedemên sereke yên astengnekirina qetilkirina jinan, polîtîkayên bêcezahiştinê ne. Kujer, ji van polîtîkayan, ji nêzîkatiyên zayendperest û ji pergala baviksalar wêrekiyê digirin. Mekanîzmayên dadweriyê yên ku bi hincetên pûç kujeran paqij dikin, bi vî rengî rê li ber qetilkirina jinan vedikin.
Wekî TJK-F, em li dijî van polîtîkayên qirkirinê, bêdadî, bêcezahiştin, tundî, destavêtin û zewaca zarokan; di çarçoveya pêngava ‘Dem dema jinê ye’ de têkoşînê bilind dikin. Bi diruşma ‘Ji bo Gulden Komurcu dad’, em bang li hemû jinên Kurd û aliyên demokratîk dikin ku di 25’ê Gulana 2026’an de, saet di 19:00’an de li navçeya Drancy ya Parîsê beşdarî meş û daxuyaniya me bibin. Werin em bi hev re dengê xwe bilind bikin û hesab bipirsin.
