Rêveberiya Caracas îdîa kir ku koma navborî ji bo rewakirina êrîşeke DYE’yê ya li ser Venezuelayê, li Trinidad û Tobagoyê plan dikir ku êrîşî keştiya şer a DYE’yê ya bi navê USS Gravely bike.
Wezîrê Karên Derve yê Venezuelayê Yvan Gil diyar kir ku wan hikûmeta Trinidad û Tobago têkildarî “operasyona ala sixte” agahdar kirine.
Li gorî Yvan Gil, “leşkerên bi pere” yên hatine girtin, girêdayî îstixbarata DYE’yê ne û armanca planê ew bû ku “Venezuela were sûcdarkirin û ji êrîşê re hincet çêbibe.”
Wezîrê Karên Hundir Diosdado Cabello ragihand ku di çarçoveya operasyonê de herî kêm 4 kes hatine girtin.
Ev bûyer di demeke welê de qewimî ku DYE hêza xwe ya leşkerî ya li Karayipan zêde dike. Du balafirên B-1B ên artêşa DYE’yê li ser Venezuelayê firiyan; ev di van hefteyên dawî de bû şova hêzê ya cara sêyemîn. Rêveberiya Washington ev operasyon weke “têkoşîna li dijî narko-terorîzmê” pênase kir, pispor diyar dikin ku rewatiya hiqûqî ya van fealiyetên leşkerî, bi nîqaş e.
Serokê Dewleta Venezuela Nîcolas Maduro van hemleyên leşkerî yên DYE’yê weke “şerê ji bo petrolê” pênase kir û ragihand ku peymanên gaza xwezayî yên bi Trinidad û Tobago re betal kirine.
Maduro Serokwezîrê Trinidad û Tobago Kamla Persad-Bissessar sûcdar kir ku hewl dide gendeliyan derbixe.
Li aliyê din Persad-Bissessar got, welatê wî dê li dijî “gefên Venezuelayê serî netewîne” û anî ziman ku ew ê li dijî kartelên tiryakê têkoşînê bidomînin.
Ev krîz di demekê welê de diqewime ku DYE pêkanînên xwe yên aborî yên li ser Venezuelayê didomîne û her wiha hevrikiya li ser çavkaniyên enerjiyê ya li herêmê jî zêde dibe.
