Bi ragihandina Manîfestoya Duyemîn a Banga Aştî û Civaka Demokratîk re li Rojhilata Navîn guhertinên bingehîn pêk hatin. Gelên Kantona Firatê têkildarî Banga Aştî û Civaka Demokratîk a Rêber Apo ya ku ji hemû pirsgirêkan re çarerseriyê tîne ji ANF`ê re axivîn.
Dayika bi navê Fatme Îsmaîl got ku Rêber Apo cîhan ji binî ve guhert û bi fikrên xwe jiyaneke nû ji bo wan afirandiye û got: “Rêber Apo bi manîfesto û parêznameyên xwe, guhertineke bingehîn pêk anî. Ji destpêkê heta roja me ya îroyîn li hemberî dewletên desthilatdar ên ku li ser bazirganiyê xwe bi rê ve dibin, komkujiyan pêk tînin, dîrok nivîsand. Fikra Rêber Apo ji bo wekhevî, azadî, edaletê û ji bo tevahiya jinan e. Dihêle ku jin bibe pêşeng û bi taybetî jinên li Bakur û Rojhilatê Sûriyeyê yên çeka xwe hildane û şer dikin, êdî xwe dane îspatkirin. Ez bang li hemû dayikan dikim ku êdî rabin ser piyan.”
‘BI RIHÊ JINA AZAD EM Ê RÊBERÊ XWE AZAD BIKIN’
Fatme Îsmaîl anî ziman ku fikra Rêber Apo weke ku mirov ji nû ve ji dayik bibe ye û wiha berdewam kir: “Bi saya Rêber Apo em li vir in. Ger ne Rêberê me bûya em ê tune bibûna. Rêber Apo hebûna me misoger kir. Ma ne mirin carek e, ez bang li dayikan dikim ku em biherikin ber bi Îmraliyê ve û Rêberê xwe azad bikin. Em ê bi rihê dayikê û bi rihê jina azad, bigihîjin serkeftinê.”
‘DIVÊ JINÊN SÛRIYEYÊ XWE AZAD BIKIN’
Hevseroka Meclîsa Bajarê Eyn Îsayê Ezîze Hesen jî axivî û diyar kir ku bi saya Rêber Apo jinên Ereb bûne pêşeng û got: “Vaye ez li vir im. Ez jî weke jineke Ereb bi saya Rêberê xwe li vir im. Bi fikra Rêber Apo jina Ereb rabû û ew jin bû lehî û ber bi civakê ve herikî. Jina Ereb kor bû û bêdeng bû, niha em bi saya Rêberê xwe rabûn. Rêber Apo bi vê manîfestoyê re guhertineke bingehîn pêk anî. Niha bi sedan jin li hemû qadên civakî cih girtiye. Weke jineke Ereb di her saziyê de cih digirim. Berê em di nava qurzîkekê de bûn, dengê jinên Ereb jî tune bû. Niha ew jin bi deng bûye, derdikeve, diaxive û pêş dikeve. Niha her jineke Sûriyeyê divê rabe ser piyan, divê em kesayeta xwe azad bikin û em bikaribin civaka xwe ji bi fikra Rêber Apo azad bikin.”
‘DIVÊ HER KES DI XWE DE GUHERTINÊ PÊK BÎNE’
Mamosteyê Ziman û Wêjeya Kurdî Egîd Nasiro jî anî ziman ku divê êdî her kes xwe di guhertina mutleq de derbas bikin, da ku bigihîjin azadiyê û ev yek anîn ziman: “Gelek mijarên girîng hene ku di nava xwe de çareseriya duh, îro û sibe ye. Ew çareserî ye. Niha dema ku kar dibe, divê her kes di nava lêgerînê de be. Niha gelek kes nikarin di xwe de guhertinan pêk bînin. Êdî Rêber Apo nexşerê daniye pêşiya me. Divê êdî ew kesê ku bikaribe wê guhertinê pêk bîne, pêşî di xwe de guhertinekê pêk bîne, da ku bikaribe vê guhertinê pêk bîne û xwedî li keda Rêber Apo ya bi salan derkeve.”
‘BANGA RÊBER APO RIHÊ DEMÊ YE’
Egîd Nasiro da xuyakirin ku projeya ku niha li Bakur û Rojhilatê Sûriyeyê dimeşe dibe îlham û got: “Di sîstema ku dewlet bi rê ve dibe de, komkujî û qetilkirin pêk tên. Niha ew berê xwe didin projeya me, ew jî dibe xizmeta projeya me. Herikîna wê projeyê berdewam e, da ku li derdora xwe bandoreke gelekî mezin pêk bîne. Her tişt bi zelalî hatiye gotin, rastî hatiye jiyîn. Heta zarokên biçûk jî dikare fêm bike ku di her mînakekê de wateya jiyaneke çawa hatiye dayîn. Dîrokî ye, felsefî ye û heta di hemû beşê de hatiye nivîsandin, ew bi xwe rihê demê ye.”
‘BÊYÎ JINAN ÊDÎ CIVAK NAMEŞE’
Hevseroka Fakulteya Zanista Civakî Narîn Temo got ku Rêber Apo her tim rola jinan dike rola esasî û destnîşan kir ku îro jî jin di her warê jiyanê de rola xwe dilîze û got: “Rêber Apo êdî rola jinan tekez kiriye ku bêyî jinan êdî civak nameşe. Em dema behsa Aştî û Civaka Demokratîk dikin jî dîsa rola jin li pêş e. Civaka demokratîk a ku em dibêjin, girêdanbûna wê bi jinê re ye û ji hev qut nabe. Jin civak e, jin demokratîk û esas e. Ne tenê nîviya civakê ye civak bi xwe ye. Ji dîrokê heta roja me ya îroyîn, çawa jin birêvebirina civakê re mijûl dibû, îro dîsa careke din civakê bi rê ve dibe. Îro projeya Rêber Apo ne tenê ji bo jinên Kurd e, ji bo tevahî jinên cîhanê ye.”
‘ÊDÎ JIYANA KOMUNAL ESAS E’
Hevşaredara Eyn Îsayê Sene El Elî jî axivî û diyar kir ku jina azad xwedî li fikra Rêber Apo derdikeve û got: “Rêber Apo tevahiya pêkhateyan diparêze. Ew guhertina ku pêk tê, tevahî neteweyan di nava xwe de dihewîne. Ji tevahî neteweyên ku di nava Rêveberiya Xweser de cihê xwe digirin, jê re dibe pêşeng. Niha dema em dibêjin jina azad, ew e ku xwedî li fikra Rêber Apo derdikeve. Jina Ereb jî êdî bi wê yekê radibe. Êdî me di nava xwe de dawî li kapîtalîzmê aniye. Êdî jiyana komunal, jiyana azad û jiyana wekhev esas e. Bi vê manîfestoyê re jin dibe rêveber, pêşeng û mamosteya civakê.”
Hevserokê Têkiliyên Partiya Yekîtiya Demokratîk (PYD) Loqman Jaro jî destnîşan kir ku bi saya Rêber Apo şoreş ji gelek qonaxan derbas bû û wiha domand: “Rêber Apo dibêje yên ku şer kirine ew dikarin aştiyê pêk bînin. Vaye me gelek salên dûr û dirêj şer kiriye, divê aştî pêk were. Dema aştî jî pêk were, guhertin pêk tê. Niha jî gelekî girîngiya manîfestoyê heye, ev doz bi aştiyê êdî tê çareserkirin û êdî dest bi avakirina civaka aştî bikin. Divê dewleta Tirk jî di xwe de guhertinan pêk bîne, da ku em êdî dawî li şer bînin û civaka aştî misoger bikin.”
