Xizmên Windayan û Komeleya Mafê Mirovan (ÎHD) a Şaxa Amedê di hefteya 886’emîn de çalakiya xwe li ber Bîrdariya Mafên Mirovan a li Parka Koşûyolû ya li navçeya Rezanê pêk anîn. Di çalakiya ku pankarta “Bila winda bên dîtin, kiryar bên darizandin” hat vekirin de doza Bedrî Alagam ê ku di sala 1995’an de hatibû binçavkirin ket rojevê. ÎHD’ê da zanîn ku girtekên derbarê binçavkirina Alagam de hene, lê têkildarê serbestberdanê nîne. ÎHD’ê, diyar kir ku tevî hemû serlêdanan jî ev 30 sal in ji Alagam agahî nehat wergirtin.
Li Êlihê jî çalakî li ber Abîdeya Mafên Mirovan a li Kolana Gulistanê di hefteya 722’yan de berdewam kir. Di daxuyaniyê de, bêcezatiya derbarê doza xwendekara Zanîngeha Munzurê Gulistan Doku ku di 5’ê Çileya 2020’an de li Dersimê winda bû hat rojevê. Komeleya Mafên Mirovan (ÎHD) diyar kir ku lêpirsînek bi bandor li dijî gumanbarê sereke yê dozê nehatiye kirin, li cihê wê malbat tê darizandin. Xwişka Gulistan Doku Aygul Doku got, “Em ji ber lêgerîna xwişka xwe têne darizandin.”
Şaxa ÎHD’ê ya Colemêrgê û xizmên windayan ji bo hefteya 212’emîn a çalakiyên xwe li Kolana Hunerê ya navçeya Geverê ya Colemêrgê kom bûn. Di çalakiyê de ku pankartek bi nivîsa “Bila winda bên dîtin, kiryar bên darizandin” hat vekirin, wêneyên kesên ku di dema binçavkirinê de hatine windakirin hatin hilgirtin. Di çalakiya vê hefteyê de aqûbeta Bedrî Alagam hat pirsîn.
ÎHD’ê û xizmên windayan daxwaza dîtina windayan, darizandina berpirsiyaran û bidawîanîna siyaseta bêcezatiyê dubare kirin.
