Fermandariya Yekîneyên Berxwedana Şengalê (YBŞ) bi wesîleya Cejna Çarşema Sor daxuyaniyeke nivîskî weşand.
Daxuyaniya YBŞ’ê bi vî rengî ye:
“Di berbanga vê roja pîroz de ku xweza bi rengên nûbûnê xwe xemilandî û giyan bi wateyan geş dibe, bi helkefta sersala Êzidiyan ‘Serê Salê’ cejna jiyan û nasnameyê, cejna ji nû ve jidayikbûna hêviyan, em pîrozbahiyên xwe yên germ pêşkêşî gelê xwe yê Êzidî û dostên wan dikin.
Em vê roja pîroz û biwate di serî de, li malbatên Cangoriyên xwe, li her dayika ku birînên xwe hilgirtibûn û wek xelata rûmetê pêşkêşî xak û doza me kirî, her bavê ku dilê wî li ser gorekê lerizî û neşikestî, her zarokek sêwî ku hîna navê bavê xwe wekî sirûdekê di dilê xwe de bi bîr tîne û her kesê ku hesreta xwe veguherand agirê ku rêya me ronî dike, pîroz dikin.
Divê neyê jibîrkirin ku bêyî fedekariya van Cangoriyan me nekarîbû van rojan bijîn û ne jî me karîbû van rêûresm û edetên pîroz ên ku nasname û hebûna me îfade dikin, biparêzin. Ew di wijdanê demê de zindî ne, di hûrguliyên me de hene û divê ew di wijdanê me de wekî nebzek bêrawestan û alayek ku qet nakeve bimînin.
Cejna ‘Serê Salê’ di salnameya demê de ne rêûresmeke derbasbûyî ye, belkî şansek e ku em girêdana xwe ya kûr a bi koka xwe re destnîşan bikin û peymana xwe ya bi xakê re, bi bîranînê re, bi kesên ku bi Cangoriyan rabûn re nû bikin, da ku ev gel bi serbilind bijî. Ev Cejna serketina li bemberî jibîrkirinê ye, sekna li hemberî qirkirinê ya ku bi dengekî bilind dibêje; Em li vir in, em ê hebin, em ê bimînin û em li ber xwe didin.
Bi vê boneyê em silav û rêzên xwe yên taybet ji Rêber Apo re pêşkeş dikin, ku ramana xwe ya azadîxwaz û geş rêyên gelên bindest ronî kir û bi xwe naskirin, birêxistinkirina civakî û vegerandina îradeyê re hişyariyek nû da me. Projeya wî ne tenê referanseke siyasî ye, di heman demê de pergalek exlaqî û nêzîkatiya azadiyê ye ku îlhamê dide mirovên azad û baweriya me ya çarenûsa hevpar xurt dike.
Şengal, ew xaka ku şahidî ji ceribandinên herî dijwar û qehremaniyên herî mezin re kiriye, ne parçeyek erdnîgarî ya jibîrbûyî ye, dilê dozek zindî ye û sembola sekna mirovatiyê ye, li hember hemû hewldanên qirkirin û tinebûnê ye. Em weke Yekîneyên Berxwedana Şengalê teqez dikin ku parastina Şengalê û îradeya gelê wê ne vebijarkek e, erkek pîroz û xeta sor a bêdestûr e.
Her wiha, li hember hewildanên dubare yên xwe ferzkirin û kişandina Şengalê di nav projeyên gumanbar ên ku xizmeta ajandeyên biyaniyan dikin, em bi eşkere radigihînin: Em rê nadin careke din îradeya gelê me were kuştin û em derfetê nadin wan kesên ku dixwazin aramî û ewlahiya herêma me têk bibin û hewla perçekirina tevna berxwedana me didin.
Dîsa, bi boneya vê roja pîroz em bang dikin ku gelê me vê Cejnê bike wesîleya yekitî, tifaq û hevgirtina xwe û li hember hewildana têkbirina destkeftiyên Êzidiyan şiyar be.
Û em hêvî dikin ku ev cejn bibe destpêka serdemek nû ji bo hemû pêkhate û gelên herêmê û bi hev re jiyan kirina bi awayekî aştiyane ya li ser esasê xwişk-biratiya gelan.
Di vê kêliya dîrokî û vê roja pîroz de, em soza xwe ji gelê xwe re, li ber xwîna Cangoriyan û ji bo her dayik û bavên dilşewat nû dikin: Em ê dilsozê vê meşa birûmet bin û em ê xeyalên Cangorî û xelkê xwe bikin pêşerojeke bi rûmet.”
