Yekitiya Ragihandina Azad (YRA) ji bo şehadeta rojnamevan û kedkarê çapemeniya azad şehîd Azîz Koyluoglu daxuyaniyek da.
Daxuyanî li pêşiya Navenda Çand û Hunerê ya Mihemed Şêxo ya li bajarê Qamişloyê bi amadebûna bi dehan rojnamevanan hat xwendin.
Hevserokê YRA’yê Dilyar Cizîrî daxuyanî xwend.
Di daxuyaniyê de wiha hat gotin: “Îro careke din me agahiya şehadeta mamoste û hevalekî me yê rojnamevan ku di encama êrişa balafirên bêmirov ên dewleta Tirk de jiyana xwe ji dest daye, bihîst. Vê carê êrişa wan a nemerdane li dijî mamoste, hevrê, rojnamevan û pêşengê ragihandina azad Azîz Koyluoglu bû.
Şehîd Azîz ku ji Bakurê Kurdistanê ye, di sala 2000’î de beşdarî xebatên ragihandina azad bû û li gelek aliyên welat hovîtî û sûcên dewletên dagirkir, belge kirin û bi raya giştî re parve kirin.
Dema şoreşa Rojava-Bakur û Rojhilatê Sûriyeyê destpê kir, hevrê Azîz bêyî dudilî berê xwe da vê qadê û li vir tev li xebatên ragihandina azad bû.
Ji Dêrikê bigire heta bi Efrînê li her devereke vê xakê di sazî û dezgehên ragihandinê de xebat da meşandin û pêşengtî kir. Bi nivîs û analîzên xwe rûyê desthilata Tirk aşkera dikirin. Di heman demê de edîtorî û rêveberiya gelek saziyên ragihandinê da meşandin.
Li kêleka xebatên xwe yên ji bo saziyên ragihandinê bi sedan ciwanên Bakur û Rojhilatê Sûriyê di xebatên çapemeniyê de perwede kirin. Îro gelek şagirtên Şehîd Azîz di sazî û dezgehên ragihandina azad a Bakur û Rojhilatê Sûriyeyê de bi pêşengî xebatan dimeşînin.
Ji ber wê jî dewleta Tirk a tirsonek ku xwe li xebatên pêşengên me ranagire, hevrêyê me Azîz Koyluoglu ku yek ji hêmanên serke yê rastiyan bû, di roja 27’ê Çile de li Raniya ya Başûrê Kurdistanê bi balafirên xwe yên bê mirov ew kir hedef. Di encamê de hevrê Azîz gihişt asta şehadetê.
Mamoste û hevrê Azîz bi xebatên xwe yên ragihandinê ku li Bakur û Rojhilatê Sûriyê da meşandan bû dibistanek bingehîn ê sazîbûna ragihandina azad a vê herêmê. Dema ji Rojava berê xwe da Başûrê Kurdistanê jî xebat di heman astê de da meşandin. Pêre jî têkiliyên xwe yên bi Baku rû Rojhilatê Sûriyeyê re dewam kirin. Ji lewma em hemû deyndarê şehîd Azîz in. Em ê ji bo pêkanîna hêviyên wî xebatên xwe bê navber bidomînin.
Em wekî xebatkarên ragihandina Azad li Bakur û Rojhilatê Sûriyeyê di serî de sersaxî ji malbata Şehîd Azîz, heval û hevrê wî û tevahî gelê Kurdistanê re dixwazin. Em ji êrişkaran re dibêjin îro bi sedan şagirtên şehîd Azîz li ser rêya ragihandina azad xebatan didomînin.
Em ji wan re dibêjin ew ê tu carî nikaribin pêşveçûna şagirtên Azîzan, Seyîdan, Gurbetan, Îsaman, Dilîşanan, Rizgaran, Naziman û Cîhanan rawestînin.
Bila dijminê rastiyê zanibe ew çi bike bila bike, serî li kîjan rêbazên dermirovî bide jî, dê tu carî nekare encaman bi dest bixe.
Bi vê wesîleyê careke din em soza xwe dubare dikin ku em ê têkoşîna xwe ya li ser rêya Azîzan hîn xurtir bimeşînin. Em ê ji bo aşkerekirina rûyê rast ê dijminan bi heman rihê em ji Şehîd Azîz fêrbûne ne rêya şehîdan bidomînin.”
