Paytexta Rûsya Moskow û derdora wê di tevahiya şevê de bû hedefa balafirên bêmirov. Şaredarê Moskowê Sergey Sobyanin sihara sêşemê daxuyanî da û ragihand ku herî kêm 620 balafirên bêmirov hatine şandina herêmê.
Sobyanin di daxuyaniya li ser Telegramê de ragihand ku navbera şeva duşemê û sêşemê saet 05.00’an li herêma Moskowê 180 balafirên bêmirov hatine îmhakirin.
Waliyê Herêma Moskowê Andrey Vorobyov jî ragihand ku ji ber êrîşan 3 kes birîndar bûn. Hat diyarkirin ku zarokekî 10 salî jî yek ji birîndaran e.
Êrîşan bandor li depoyeke şîrketa Wildberries jî kir ku e-ticareta Rûsyayê ye.
Servîsa çapemeniyê ya şîrketê piştrast kir ku “komplekseke lojîstîkê” ji ber êrîşê zirareke sivik dîtiye.
Roja yekşemê di êrîşên bi balafirên bêmirov de li Rûsyayê 12 kesan jiyana xwe ji dest dabûn, di êrîşên Rûs ên li ser Ûkraynayê de jî 7 kesan jiyana xwe ji dest dabûn.
LI ZAPORIJYA ÊRÎŞA RÛS: 2 KES MIRIN
Li herêma Zaporijya ya li başûrêrojhilatê Ûkraynayê, êrîşên Rûs bû sedema windahiya can.
Waliyê Herêma Zaporijya Îvan Fedorov ragihand ku di êrîşa Rûs a li ser kooperatîfeke çandiniyê de mêrekî 43 salî û jineke 41 salî mirin.
