Serokê Giştî yê Tevgera Alimên Îslamî û Kurdistanî ya Hemdem û Nûjen Hafiz Ahmet Turhalli têkildarî êrîşên dagirkeriyê yên ku dewleta Tirk bi hevkariya PDK’ê li Başûrê Kurdistanê dayî destpêkirin û êrîşên li ser çand û zimanê Kurdî, ji ANF’ê re axivî.
‘ÊRÎŞÎ HEMÛ NIRXÊN KURDAN DIKE’
Turhalli diyar kir ku gelê Kurd yek ji gelên herî qedîm û kevin ê cîhanê ye û li erdnîgariya ku bi hezaran salin li ser dijî xwedî çand û zimanekî ye. Turhalli destnîşan kir ku dagirkerên erdnîgariya Kurdistanê ji bo tunekirina nirxên gelê Kurd, her tiştê dikin û wiha got: “Bi taybetî jî dewleta Tirk li ser bingehê nîjadperestî û înkarê hatiye avakirin û bi vî rengî dewam dike. Herî zêde jî dewleta Tirk dixwaze çanda gelê Kurd tune bike. Li ser ol û Îslamê bêbextiyan dike. Evane ji bo ku xirabiyên xwe baş nîşan bidin, şev û roj dixebitin. Ji gelê Kurd û cîhanê re çi dibêjin: ‘pirsgirêka me PKK ye û em li dijî wan şer dikin.’ PKK zarokên vî gelî ne û ev gel bi xwe ye. Ji bo Fîlîstînê li ser azadiyê siyasetê dike, yanî wisa dixuyên. Helbet azadî mafê Fîlîstîniyan jî ye. Lê dema vê yekê tînin ziman, li aliyê din jî dixwazin zimanê Kurdî tune bikin û çand, erdnîgarî û çavkaniyên aboriyê tune dikin. Ji bo tunekirinê her cure siyasetê bi derewan dixin dewrê. Vê yekê jî di bin navê ola Îslamê de dikin. Em li dijî tunebûnê, li ber xwe didin.”
JI KURDÊN AKP’Î RE: XIYANETÊ LI XWEDA JÎ DIKIN
Turhalli Kurdên Misilman ên li dora operasyonên qirêj ên desthilatdariya AKP-MHP’ê kom bûne, hişyar kir û diyar kir ku di demên dawî de li ser gelê Fîlîstînê propagandaya Îslamê tê kirin û bi vê yekê re mirov xirabiyên dewleta Tirk û AKP’ê ji nedîtî ve tên. Turhalli wiha pêde çû: “Kurdên ku bi van polîtîkayên dewleta Tirk hatine xapandin, xwe vekişandin xeta xiyanetê. Hz. Muhammed dibêje ku nebin koleyê xayînan. Îro zimanê gelê Kurd tune dikin û hûn jî ji vê yekê re çepik lêdixin. Wê demê hûn li ser xeta xiyanetê ne. Binêrin, Şêx Abdusselam Barzanî tenê ji ber ku azadiya zimanê Kurdî xwest, hate îdamkirin. Ji ber ku Mele Seîd Kurdî xwest dibistaneke bi perwerdeya zimanê kurdî bê vekirin, bi gotina dîne avêtin timarxaneyê. Gelo îro dewleta Tirk çi dike? Ez vê ji Kurdên ku li dora AKP-MHP’ê disekinin û bi Îslamê xwe dixapînin re dibêjim, hûn derdikevin dibêjin Fîlîstîna azad û bila Kurdistan jî tune bibe. Gelo ev ne xiyanet be, wê demê çiye! Gelê me ji ber ku govendê digerîne, dikeve hepsê. Ma hûn nabînin? Qedexekirina zimanê me têrê nekir, niha jî dixwazin bi temamî tune bikin. Hûn vê dibînin, vêca ev ne xiyanet e? Îro çima evqas bi hovane û zalimane êrîşî PKK’ê dikin. Ji ber ku 100 sal in ji bo tunekirina gelê Kurd plan çêdikirin, lê belê PKK’ê ev plana wan xira kir. Lewma li Îmraliyê bi hêrs û nefret nêzî Rêberê Gelê Kurd Ocalan dibin. Ji bo vê yekê ji mirovahiyê derketine. Ji bo tolê hilînin. Îro li Kurdistanê ji bo Fîlîstînê dimeşin. Bi hezaran Kurd hatin qetilkirin, ti kes nemeşiya. Jinên Kurd hatin qetilkirin, ti kes nemeşiya. Ev xiyanet e. Ev ne mirovahî, ne exlaqî û ne jî oldarî ye.”
‘BI RENGEKÎ DIN NAYÊ NÎQAŞKIRIN; TIŞTA KU BARZANÎ DIKIN XIYANET E’
Turhalli anî ziman ku li Başûr PDK û malbata Barzanî piştgiriyê dide êrîşên îmha û dagirkeriyê yên dewleta Tirk û destnîşan kir ku ev pratîka wan xiyanet e. Turhalli bal kişand ser komkujiya Enfalê jî û ev tişt bilêv kir: “Em navê kesên ku ji bo kuştina zarokên Kurd bang li dijminên gelê Kurd dikin, bi zelalî diyar bikin. Ev xiyanet e. Evane jî xayînin. Ev ne xeflet e, ji ber ku mirov xefletê bêyî ku bizane dike. Ev ne xeflet e, ji ber ku bi zanebûn û xwestek vê yekê dikin. Ev xiyanet e. Ji ber ku em jî dibihîzin, dibêjin ku Tirk bila van zarokên Kurd ên wêrek bikujin, em ê jî rizgar bibin. Wê demê em li bîra we bînin. Xwe nexapînin! Di pêvajoya referandûmê de Erdogan ji we re çi got, ma negot, ‘ez we ji birçan bikujim?’ Gelo we ev yek jibîr kir? Dest ji vê xiyanetê berdin.
Îro li wir dibêje ku, PKK dibe sedem ku dewleta Tirk êrîşî vir bike. Ev derew û bêbextî ye. Îro hûn bi saya PKK û şehîdan li wir dikarin bijîn. Kurdistan yek e, ne 4 parçe yan jî 5 parçe ye. Êdî em hemû ji vê re bêjin, bes e. Zarokên me dikujin, erdnîgariya me talan dikin û hûn bêdeng dimînin. Xweda û Pêxember dibêje ku, ‘xiyanetê li xwe nekin. Xiyanetê li emanetan nekin’. Gelê Kurd emanetek da we û got ku me azad bikin. Îro hûn li wir, di vîlayên luks de dijîn, ev xiyanet e.
BANGA JI BO OLDARAN
Ez bang li hemû oldaran dikim. Bila li dijî vê yekê sekna we hebe. Em xiyanetê li heqîqetê nekin. Dijmin karê xwe dike, em serî netewînin. Binêrin îro çawa li Bakur tehemûlê gotina ‘Pêşî Peya’ nakin, wê tehemûlê we jî nekin. Binêrin tiştên li Efrînê dikin. Kurd nehiştin. Eger em li dijî xiyanetê nesekinin, em ê bibin parçeyekî wê.”
