Îro çar şervanên YPJ, Komandos û QSD’ê hatin spartina axê. Şehîd Arjîn Reşîd (Berfîn Mihemed) 8’ê Kanûnê li Bendava Tişrînê, Amanos Xizênê (Oso Bekî) 11’ê Kanûnê li Qereqozaxê, Tah (Tah Hemzê), Çiya (Şêx Hisên Mislim) 14’ê Kanûnê li Qamîşlo şehîd bû.
Beriya ku merasîm destpê bike, deqeyekê rêz hat girtin.
Piştre jî Hevserokê Kar û Barên Civakî Ehmed Xoce axivî û got, “Di navbera du rojan de du bira şehîd bûn, ev jî nîşan dide ku em ê heta dawiyê xwedî li xeta xwe ya şehîdan derkevin.”
Xoce got: “Em di pêvajoyeke gelekî hesas re derbas dibin, piştî 19’ê Tîrmehê ku ji Kobanê destpê kir, ji wê rojê heta roja me ya îro dijminên gelê Kurd û bi taybet jî dewleta Tirk a faşîst bi hemû hewldanên xwe dixwaze vê şoreşê tune û qir bike. Lê berovajî wê êdî me xwe li vir îsbat kir û em ê bi ser bikevin.”
Piştre wesîqeya şehîdan hatin xwendin û radestî malbatên wan hatin kirin.
Cenazeyên şehîdan bi berzkirina dirûşmeya “Şehîd Namirin” hatin veşartin.
