Bi hezaran şêniyên kantona Cizîrê îro cenazeyên endama Kordînasyona Kongra Star Hêva El Erebo (Saliha Viyan) û endamê Partiya Yekîtiya Demokratîk Dilawar El Erebo (Hogir Dirbêsiyê) ku roja 27`ê Çileyê di encama êrîşa dewleta Tirk a dagirker li herêma Ranya ya başûrê Kurdistanê şehîd bûbûn, bi merasîmeke bi heybet veşartin.
Şêniyan cenazeyên her du şehîdan ji Meclisa Malbatên Şehîdan a bajarê Dirbêsiyê rakirin û bi meşeke girseyî ber bi goristana şehîd Rûstem Cûdî ya li gundê Berkevirê ve bi rê ketin.
Merasîm bi deqeyeke rêzgirtinê dest pê kir. Piştre endama Kordînasyona Kongra Star Şîraz Hemo axivî û diyar kir ku êrişa li dijî her du şehîdan Salîha û Hogir, êrîşa li dijî jinan û ciwanan e, bi armanca têkbirina têkoşîna ji bo azadiyê û got, “Li ser rêya şehîdan têkoşîna xwe bilind bikin û li dijî plan û komkujiyên dewleta Tirk a dagirker ên li dijî gelan li ber xwe bidin. “
Endamê Kongreya Îslama Demokratîk Amar El Qadirî diyar kir ku ciwan û jinên herêmê ji bo parastina xaka xwe tiştên herî bi nirx feda dikin.
Bavê şehîd Salîha û apê şehîd Hogir jî axivîn û destnîşan kirin ku şehîd berdêla azadiyê ne û banga yekîtiya neteweyî ya gelê Kurd kirin û ji bo azadiya fîzîkî ya Rêber Abdullah Ocalan banga bilindkirina têkoşînê kirin.
Piştî ku belgeyên her du şehîdan hatin xwestin û radestî malbatên wan hatin kirin. Cenazeyên her du şehîdan di nava tilîliyên dayikan û dirûşmên dilsoziya bi şehîdan re hatin veşartin.
