Di 4‘ê Adara 2025’an de Endamê Hêzên Komandosê Beşar Dihêm (Qendîl Hilko) dema erka xwe ya welatparêzî pêk dianî, li bajarê Hesekê şehîd bû.
Xelkê bajarê Qamişlo ji bo şehîdê xwe bispêrin axa pîroz, merasîmek li pekrewangeha Şehîd Delîl Sarûxan a bajarê Qamişlo lidar xistin. Endamên saziyên civaka sivîl, Kongra Îslama Demorat, navçe û gundewarên bajarê Qamişlo û endamên hêzên leşkerî jî beşdarî merasîmê bûn.
Piştî deqeyek rêzgirtinê, Endama Meclisa Malbatên Şehîdan a bajarê Qamişlo Fatma El Casim diyar kir ku xwîna şehîdên wan ne erzane û ew ê her tim têbikoşin heta ku tola şehîdên xwe hilînin. Fatma El Casim got, “Bila dijmin baş bizane ku em gelekî xwedî îrade ne û bi hemû netewên xwe em ê serkeftinê mîsoger bikin.”
Li ser navê Hêzên Leşkerî Nezîr Sofî diyar kir ku ew soz didin dayikên şehîdan ku li ser riya şehîdên xwe têkoşîn bikin û wiha axivî: “Berxwedaniya ku şehîdên me ji bo welatê xwe kirin, ne hindik e û pêwîste em jî li gor vê berxwedaniyê bin û xwedî li keda şehîdên xwe derkevin. Şehîdên me ji bo ku welat û welatiyên xwe biparêzin tişta herî giranbuha fedayî welat kirin û bûn ronahiya pêşketina projeya me ya demokrasiyê.”
Endamê Kongra Îslama Demokratîk Casir El Salih da zanîn ku ti dewlet nikarin projeya wan têk bibin û got: “Em soza xwe dubare dikin ku li ser rêya şehîdên xwe têbikoşin.”
Piştî wesîqeya şehîd hat xwendin û radestî malbata şehîd hat kirin, bi tilîliyên dayikan û dirûşmeyên ciwanan cenazeyê şehîd hate veşartin.
