Hevşaredara Bajarê Mezin a Wanê Neslîhan Şedal û Serokwekîlê Meclîsa Şaredariyê Tûncer Saginç diyar kirin ku wê li hemberî karên ne li rê yên qeyûm û polîtîkayên talanê, civînên mehane yên meclîsê lidar bixin û Wanê ji însafa qeyûm re nehêlin. Meclîsa Şaredariya Bajarê Mezin a Wanê ku meha Sibatê ji aliyê Waliyê li Wanê Ozan Balci ve hate desteserkirin, bi serokatiya Hevşaredar Neslîhan Şedal û Abdullah Zeydan li hev kom bû. Meclîsê kiryarên bêqhiûqî yên qeyûm û pirsgirêkên Wanê nîqaş kir.
‘ÇI DIBE BILA BIBE EM Ê GELÊ XWE BI TENÊ NEHÊLIN’
Hevşaredara Bajarê Mezin a Wanê Neslîhan Şedal li ser mijarê ji ANF’ê re axivî û got, “Li gel darbeya li hemberî meclîsê jî em xwedî li îradeya gel derdikevin û li vê derê bersivê didin vê helwestê. Bi darbeya qeyûm re çarenûsa gelê me wê ne girêdayî gotinên kesekî be. Em ji vê derê dibêjin, çi dibe bila bibe em ji bo 5 salan hatine hilbijartin. Ji ber vê yekê weke berpirsyariya li pêşberî gelê xwe em ê têkoşîna xwe dewam bikin û ji ber vê yekê me meclîsa xwe li hev kom kir. Çi dibe bila bibe gelê me wê bi ser bikeve, gelê Wanê wê bi ser bikeve. Ji bo bersivê ji gel re bidin em ê jî ji niha û pê ve her meh meclîsa xwe bicivînin û karên ne li rê yên qeyûman ên li şaredariyan bi gelê xwe re parve bikin.”
QEYÛM WÊ BIÇE, ÎRADEYA GEL WÊ BI SER BIKEVE’
Serokwekîlê Meclîsa Şaredariya Bajarê Mezin a Wanê Tûncer Saginç jî anî ziman ku wê her mehê meclîsê bicivînin, desteserkirina şaredariyan û talana qeyûm kifş bikin. Saginç got, “Me meclîsa xwe kom kir û em ê rê nedin karên ne li rê.” Saginç bi dewamî got, “Polîtîkaya qeyûm ne polîtîkayeke ku 5 salan dewam bike, di demeke kurt de divê ya gel radestî gel bê kirin û dawî li vê desteserkirinê bê anîn. Lê belê di vê dema navberê de ji bo çareserkirina pirsgirêkên gelê xwe em ê di nava hewldaneke berfireh de bin. Em ê karên şaredariyê mehane bikin rapor û bi gelê xwe re parve bikin. Bila dilê her kesî di vê mijarê de rehet be, ev polîtîkaya qeyûm têk çûye. Ji roja tayînkirina qeyûm û vir ve em di nava gelê xwe de ne. Her kes ji tayînkirina qeyûm aciz e. Qeyûm çawa ku hate tayînkirin ji Bûrsayê sekreterê giştî ji xwe re anî, rêveberiyeke burokratîk heye. Fîrmayên kar bikin ji derveyî Wanê wê bêne anîn. Ne li gorî rastiya çandî, ekolojîk û civakî ya vî bajarî ne û wê biçin ku careke din neyên. Di nava vê dem ê de em ê hem bi gelê xwe re bin hem jî têkoşîna demokrasiyê bimeşînin. Koma me ya meclîsê bi vê biryardariyê karên xwe dike.”
