Ji bo Newroza ku wê li Frankfurtê bê lidarxistin, pênc federasyonên girêdayî KON-MED’ê li hev civiyan.
Di civînê de binesaziya teknîkî, bernameya dîkê, tedbîrên ewlehiyê, veguhestina gel ji bo qadê û hemû hêmanên lojîstîk û orgînazasyonê hatin nîqaşkirin û hate armanckirin ku binesaziya bernameyê bê saxlemkirin.
Pêkhateyên KON-MED’ê ji bo ku Newroza îsalê ku ji ber Banga Aşitî û Civaka Demokratîk a Rêber Apo ji salên din xwedî wateyekî cudatir e, bi girseyî û bi coş derbas bibe xebatekî mezin dike.
Hevserokên KON-MED’ê ji bo Newroza navenda wê Elmanya ku wê bi şîara, “Azadiya Rêber Apo azadiya me ye” di 29’ê Adarê de li Frankfurtê bê lidarxistin wiha gotin: “Ev şîar banga ji bo têkoşîna azadiyê, aşitî, civaka demokratîk û xwişk-biratiyê ye. Em Newroza hemû gelan pîroz dikin û bang li Kurd û dostên wan dikin ku beşdarî cejna me ya neteweyî Newrozê bibin.”
