Li navçeya Wêranşar a Rihayê Newroz bi beşdariya bi hezaran kesî hate pîrozkirin. Qada Newrozê bi rengên kesk, sor û zer hate xemilandin û pankarta bi nivîsa “Agirê çaran bûye hezaran” hate hildan. Girseya gel bi kincên neteweyî kete qadê û demeke dirêj govend gerand.
Dayika Aştiyê Fatma Akbaş got, “Me bi dayina berdêlan xwe gihandin vê astê. Em li pişt biryara Rêberê xwe ne û ji Rêberê xwe bawer dikin. Em ê bi ser bikevin.”
Endamê Meclîsa Partiyê ya DBP’ê Tarik Yazigan jî got, “Banga Birêz Ocalan ji bo têkoşînê mîladeke. Vê bangê dilxwaziya me ya azadiyê mezin kiriye. Azadiya fîzîkî ya Birêz Ocalan wê teqez pêk were. Em ê bi banga Birêz Ocalan têkoşînê mezin bikin.”
Parlamentera Rihayê ya DEM Partiyê Dîlan Kûnt Ayan jî got, “Em neviyên Kawa ne ku serî li ber Dehaqan netewandin. Ocalan di 27’ê Sibatê de agirê Newrozê li Îmraliyê dadan. Em ê vî agirî geş bikin.”
Piştre jî agirê Newrozê bi pêşengiya Dayikên Aştiyê li ber dirûşma ‘Bijî Serok Apo’ hate dadan.
Pîrozbahî bi govenda li ber stranên Kolektîfa Rîtmên Azad bi dawî bû.
