Piştî binçavkirina Şaredarê Bajarê Mezin ê Stenbolê Ekrem Îmamoglû, çalakiyên protestoyî didomin.
Mîna rojên destpêkê, polîsan di saetên siharê de li Edene, Stenbol û Bûrsayê bi ser gelek malan de girt.
Li gorî agahiyên hatine girtin, akademîsyenên endamên Sendîkaya Kedkarên Pewerde û Zanistê (Egîtîm Sen) jî di nava binçavkiriyan de ne.
Egîtîm Sen’ê li ser hesabê xwe yê medyaya dîjîtal ragihand ku nûnerê wan ê Kargeha Zanîngeha Stenbolê Levent Dolek bi operasyonekê hatiye binçavkirin û ev tişt nivîsand: “Kar û xebatên sendîkayê ne sûc in. Demildest hevalê me berdin.”
Hat zanîn ku di serdegirtinên li Edeneyê de herî kêm 7 kes hatine binçavkirin.
Hat ragihandin ku Omer Bariş Bozkurt, Sila Gule, Yîgîtcan Yeter, Berk Deran, Halît Guney Akin, Mustafa Demîrcan û Guney ê ku paşnavê wî nehat zanîn, bi hinceta tevlî çalakiyên protestoyê bûne hatin binçavkirin.
Wezareta Karên Hundir a Tirk 25’ê Adarê daxuyanî dabû û diyar kiribû ku ji destpêka protestoyan û vir ve 1418 kes hatin binçavkirin. Ji vane bi dehan kes hatin girtin. Roja sêşemê di nava kesên hatine girtin de, 7 rojnamevan jî hebûn.
