Serokê Rûmetê yê HDP’ê Ertûgrûl Kurkçu ji ANF’ê re axivî û anî ziman ku desthilatdarî ji aliyekî ve bi rêya hevdîtinên bi Rêber Apo re hewl dide sînyalên erênî bide, li aliyê din jî bi operasyonên li hemberî CHP’ê jî hewl dide rejîma otorîter ji nû ve bi cih bike.
GEF Û RÎSKÊN LI SER DIYALOGA KURD-TIRK
Kurkçu rîskên operasyonên berfireh ên li ser CHP’ê yên li dijî lihevkirina civakî û siyaseta demokratîk nirxand û got, “Ev yek rîskeke kujer e. Rejîm bi aqlê Kurdan re qumarê dilîze. Ji aliyekî ve li tevahiya Tirkiyeyê rejîmeke nû ya otorîter-totalîter ava dike, li aliyê din jî ji wan dixwaze ku baweriya xwe bi jiyaneke di nava civakeke aram û azad a di bin serweriya wan de bîne.
Ev yek bi gotina herî sivik, dibe sedem ku Kurd ji rasteqîniya ‘diyalogê’ fikar û gumanan bikin. Kurd dibînin ku tişta bi serê wan de hat, dixwazin bi serê CHP’ê de jî bînin û wan bikin parçeyek ji vê rojevê. Fikara ku ‘fedakariya ji bo aştiyê tê kirin, bi kêrî rejîma zordar tê’ girseyên mezin ji siyasetê dûr dixîne.”
OPERASYONA LI HEMBERÎ LIHEVKIRINA BAJÊR A TEVGERA SIYASÎ YA KURD Û CHP’Ê
Ertûgrûl Kurkçu operasyona ku bi navê ‘Lihevkirina Bajêr’ li dijî muxalefeta bingehîn hate kirin, bi vî rengî nirxand: “Di îdîanameyê de ku êrîşa dadgeriyê ya li ser şaredariyên CHP’ê bi rêya wê têne kirin, bi vî rengî dibêje, ‘Teoriya formula lihevkirina bajêr ji aliyê rêveberiya rêxistina terorê ve hatiye kirin, formuleke welê ye ku di nava sîstema xweseriya demokratîk de li hin qadan dikare bê bicihanîn, di çarçoveya plansaziya tevlîkirina li rêveberiyên xwecihî yên li bajarên rojhilat hatiye avakirin û navê Lihevkirina Bajêr lê hatiye kirin’.
Bi kurtasî di demeke welê de ku serokkomar û hevkarê wê yê biçûk bang li lîderiya PKK’ê dikin ku çekan dîne û rêxistinê belav bike, yanî tişta ku jê re ‘teror’ dibêjin di bin çavdêriya rejîmê de ji aliyê hiqûqî û pratîkî ve ji holê tê rakirin, heman dewlet bi destê ‘celadê seyar’ rêveberiyên xwecihî yên Kurdan ên li Bakurê Kurdistanê û tevlîbûna Kurdan li rêveberiyên xwecihî yên li bajarên rojavayî krîmînalîze dike.”
OPERASYONEKE SIYASÎ YA BI HESABÊN LI SER HILBIJARTINÊN 2028’AN HATIYE KIRIN
Ertûgrûl Kurkçu anî ziman ku beriya hilbijartinên 2028’an ji bo atmosfera tifaqeke gengaz a demokratîk a navbera DEM Partî û CHP’ê ji holê bê rakirin, piştevaniya pirrengî ya li nava gelê li metropolan têk bibe, êrîşeke bi vî rengî hatiye kirin û got, “Li piştperdeya vê êrîşê ew armanc heye ku dixwazin nîşan bidin, dema muxalefet, Kurd û bingeha CHP’ê xwe nêzî hev bikin, wê bişewitin.”
Ertûgrûl Kurkçu destnîşan kir ku hîn jî derfetê herî esasî afirandina tifaqa demokratîk e û got, “Armanca ‘Tifaqa Demokratîk’ ku di kongreya 2020’î ya HDP’ê de hate formulekirin, bi esasî forumulasyona rola pêşengiyê ya Kurdan di nava muxalefeta civakî de ye.
JI BO AVAKIRINA ZEMÎNA DEMOKRATÎK DIVÊ GEL BI ÎNÎSIYATÎF RABE
Kurkçu pêşniyara Rêber Apo ya nû ya siyasî û têkildarî vê yekê pratîka hikumetê ya li ser avakirina zemîna hiqûqî û demokratîk nirxand û got, “Xuya ye dewlet û desthilatdarî careke din bi ‘zemîna hiqûqî û demokratîk’ nikare ji îmtihanê derbas bibe, wê derbas nebe. Mijare vedigere serî. Her civak, her înîsiyatîf, her camîa wê li cihê lê ye ‘zemîna hiqûqî û demokratîk’ ava bike.”
