Li Kampa Holê bêhtirî 35 hezar kes hene. Hin ji wan Iraqî ne û hin jî ji Sûriyeyê ne. Her wiha ji wan yên biyanî jî hene. Di heman demê de yên li Kampa Holê dimînin pir ji wan bi DAÎŞ’ê re kar kirine. Ji ber vê yekê jî her tim hewl didin ku kampê veguherînin cihê tundî û çandina hişmendiya DAÎŞ’ê.
Hevseroka Kampa Holê Cîhan Henan ji ANF’ê re qala rewşa li kampa Holê kir û anî ziman ku bi taybetî ji sala 2019’an û pê ve piştî rizgarkirina Bahozê bi hezaran jin û zarok derbasî kampê bûn û xeterî jî zêde bû.
Cîhan Henan diyar kir ku Kampa Holê ne kampek tenê ji bo girtina çeteyên DAÎŞ‘ê ye lê ew kampek xwedî xeterî û metirsiyek pir mezin e û wiha got: “Di vê kampê de jinên heyî dixwazin zarokên wan li ser hişmendiya DAÎŞ’ê mezin bibin. Da ku hişmendiya wan her tim dewam bike. Heya roja me ya îro di vê kampê de hişmendiya Îslama Radîkal ji aliyê jin û zarokên DAÎŞ ve tê meşandin. Lê ji aliyê Rêveberiya Xweser ev kamp tê parastin bêyî ti alîkariyek navneteweyî.”
RÊVEBERIYA XWESER BI HEMÛ HÊZA XWE DIXWAZE ALÎKARÎ BIKE
Cîhan Henan da zanîn ku piştî Emerîka ji alîkariya vê kampê xwe kişandiya, di aliyê pêwîstiyên jiyanî de lawaziyê rû daye û got, “Ji ber ku di Kampa Holê de yê ku pir alîkarî dikir Emerîka bû, lê bi sekinandina alîkariyan re kamp di aliyê pêwîstiyên jiyanî de pir bi paş ket. Hêza Rêveberiya Xweser a Demokratîk hêza wê nagihêje wê astê ku van pêwîstiyan giştî pêk bîne. Lê heya astekê Rêveberiya Xweser dixwaze her tiştî ji bo vê kampê pêşkêş bike.”
Cîhan Henan di dewama axaftina xwe de got: “Rûxmî ku bi dehan rêxistinên mirovî li herêmê hene lê ti ji wan alîkarî ji bo vê kampê pêşkêş nakin. Bi vê yekê Rêveberiya Xweser bi tena xwe vî barî radike.”
JI BO EWLEHIYÊ HER CAR OPARASIYON TÊN LIDARXISTIN
Cîhan Henan gotina xwe wiha dewam kir û got: “Hêzên Ewlekariya Hundirîn bi alîkariya Hêzên Sûriyeya Demokratîk û Yekîniyên Parastina Jin oparasyonek ewlehiyê li vê kampê dan destpêkirin. Ev jî ji bo parastina jin û zarokên li Kampa Holê bû. Di vê oparasyonê de xeteriyek pir mezin hat eşekerekirin.”
‘PÊWÎSTE DEWLETÊN NAVNETEWEYÎ GUH LI VÊ KAMPÊ BIKIN’
Cîhan Henan wiha dawî li axaftina xwe anî û got: “Eger hemû dewletên navneteweyî li hember vê kampê alîkarî nekin wê paşerojeke pir xeter ji bo herêmê ava bibe. Ne tenê li ser asta Sûriyeyê û Iraqê wê wê li ser asta giştî cîhanê xeteriyek rû bide.”
