Saziya Tip a Edlî (ATK) têkildarî girtiyê bi nexweşiya giran Hemet Emîn Çam ê 73 salî biryara ‘Dikare li girtîgehê bimîne’ da. Çam ku li Girtîgeha Girtî ya Tîpa T a Beşîrî ya Batmanê tê ragirtin 2 caran krîza dil derbas kir, ji sê rehên dilê wî tenê yek hatiye vekirin, du rehên din hîn girtîn e, her wiha gelek nexweşiyên wî yên kronîk hene. Li gel van hemûyan jî ji ber rapora ATK’ê nayê berdan.
Navê Mehmet Emîn Çam di lîsteya girtiyên bi nexweşiya giran a Komeleya Mafên Mirovan (ÎHD) de ye. Aliyê çepê yê Mehmet Emîn Çam felç bûye. Keça Mehmet Emîn Çam Şîmel Çam biryara ATK’ê nirxand û anî ziman ku bi Paketa Darazê ya 10’emîn re ew bi hêvî bûn, lê belê matmayî û xemgîn bûn. Şîmel Çam got, “Ya rast li pêşberî biryarê em matmayî man. Ji ber ku di Paketa Darazê ya 10’emîn de digotin, girtiyên nexweş jî di nav de hene û girtiyên siyasî jî wê sûdê jê werbigirin. Di nava malbatê, di nava derdorê de hêviyek çêbû, lê belê piştî ku em li raporeke bi vî rengî rast hatin, em xemgîn bûn. Di demekê de ku hem ev paketa darazê hem jî pêvajoya aştiyê tê nîqaşkirin, rasthatina li tiştekî bi vî rengî nîşanî me da ku divê mirov li pêşberî dewlet û sîstemê bi hêvî nebe.
Di rapora ATK’ê de ji bo mirovekî 73 salî û gelek nexweşiyên wî hene hatiye gotin, ‘Temenê wî zêde nîne, nexweşiyên wî jî dikarin li girtîgehê bêne dermankirin’. Ji bo temendirêjiyê gelo divê bib 100 salî, gelo illehî li ber mirinê divê bê berdan? ATK’ê bi kîjan fikrî, bi kîjan mejî ev gotin gotiye? Yên ku ew biryar dane doktorên ku sonda Hîpokrat xwarine. Ez êdî li wijdan û sonda wan dipirsim. Xuya ye di tipê de sondxwarin belasebep e.”
Di dawiya axaftina xwe de Şîmel Çam got, “Weke xizmên girtiyên nexweş em êdî naxwazin mirov li girtîgehan bimirin. Girtîgeh cihê tendurist û ewle nîne. Divê desthilatdarî tavilê bikeve bin bar û gaveke şênber biavêje. Bila qanûna înfazê bi rengekî wekhev bê bicihanîn.”
