Tevgera Ciwanên Şoreşger a Sûriyeyê û Yekitiya Jinên Ciwan li bajarê Dirbêsiyê yê kantona Cizîrê ji bo azadiya fîzîkî ya Rêber Apo meşek lidar xist. Di meşê de xelkê bajêr, endamên saziyên sivîl, meclis, Hêzên Ewlekariya Hundirîn û tevgerên ciwanan amade bûn.
Meş ji gundê Qenter ê bajarokê Xas ber bi Navenda Tevgera Ciwanên Şoreşger a bajêr ve dest pê kir. Di meşê de pankartên “Bi rihê ciwan û jinan em ê azadiya fîzîkî ya Rêber Apo misoger bikin” û wêneyên Rêber Apo hatin hildan.
Piştî meşvan gihîştin navendê, mîtîngek hate lidarxistin. Di mîtîngê de endama Însiyatîfa Gel a Azadiya Rêber Abdullah Ocalan Silava Simo axivî. Silav diyar kir ku têkoşîna gelan û Rêber Apo ya 50 salî dewleta Tirk a dagirker mecbûrî zimanê diyalogê û pêvajoya aştiyê kir.
Silava Simo got: “Ji bo serxistina pêvajoya Aştî û Civaka Demokratîk divê Rêber Abdullah Ocalan bi fîzîkî azad bibe.”
Her wiha li ser navê Tevgera Ciwanên Şoreşger û Yekitiya Jinên Ciwan Lîlav Hecî axivî û got: “Çareseriya pirsgirêka Kurd bi azadiya Rêber Apo ve girêdayî ye û azadiya gelê Kurd jî bi azadiya fîzîkî ya Rêbertî girêdayî ye.”
Lîlav Hecî di dawiyê de got: “Heta em serketinê misoger bikin, em ê li ser fikir û felsefeya Rêber Abdullah Ocalan bimeşin.”
Çalakî bi dirûşma “Bê Serok Jiyan Nabe” bi dawî bû.
