Dema ku artêşa Îsraîlê li Îranê bombe li santralên nukleerî dibarand, nexweşxaneyek li Îsraîlê bû hedefa fuzeyan. Îsraîlê îdîa kir ku divê Xameney ji vê êrîşê ‘berpirsyar’ bê dîtin.
Di dema êrîşên Îsraîlê de ku tevahiya şevê dewam kir, Îranê bi dehan fuze avêt. Ji ber êrîşên bi fuzeyan, li gelek herêmên Îsraîlê alarm hate dayin û şêniyên herêmê ji bo demeke kurt ketin stargehan. Li gorî medya Îsraîlê 3 jê giran 65 kes birîndar bûn.
Nexweşxaneya Soroka (başûr) a li Beershevayê ji êrîşa Îranê bi bandor bû.
Li gorî ajansa nûçeyan a Îranê IRNA’yê, di pêla dawî ya êrîşê de biryargeheke îstîxbarata leşkerî ya Îsraîlê û li nêzî Nexweşxaneya Soroka ya li Beershevayê baregeheke artêşa Îsraîlê bû hedef.
Rayedarên nexweşxaneyê gotin, “Xisareke mezin rû da.” Wezareta Karên Derve ya Îsraîlê diyar kirin ku yekser li nexweşxaneyê hatiye xistin ku leşkerên Îsraîlî yên di şerê Xezeyê de birîndar bûbûn lê dihatin dermankirin.
Wezîrê Parastinê yê Îsraîlê Katz got, “Dîktatorê Îranê yê tirsonek bi zanebûn li nexweşxane û avahiyên li Îsraîlê dixe. Ev yek sûcên giran ên şer e û Xamaney wê hesabê van sûcan bide.”
Katz got, “Li gel Serokwezîr (Binyamin Netanyhau) ji bo jiholêrakirina gefên Dewleta Îsraîlê û hejandina rejîma Ayetûllah, ji bo lêxistina li hedefên stratejîk ên li Îranê û êrîşa li ser binesaziya desthilatdariyê ya li Tehranê me fermana zêdekirina êrîşan dan.”
Netanyahu jî li ser hesabê xwe yê X’ê got, “Dîktatorên terorîst ên Îranî fuze avêtin Nexweşxaneya Soroka û sivîlên li Beershevayê. Em ê cezayekî giran bi zordarên li Tehranê bidin dayin.”
