Di çarçoveya banga Aştî û Civaka Demokratîk ya Rêber Apo de, di 11’ê Tîrmehê de li Şikefta Casene ya gundê Surdaş a navçeya Dukan a Silêmaniyê ya Başûrê Kurdistanê, bi merasîmekê ku Hevseroka Koma Civakên Kurdistanê (KCK) Besê Hozat jî di nav de bû, Koma Aştî û Civaka Demokratîk a ji 30 gerîlayan pêk dihat, çekên xwe şewitandin û niyeta xwe ya ji bo çareseriya aştiyane nîşanî hemû gelan û cîhanê dan.
Weke ji çar aliyên Kurdistanê û derveyî welat, ji Şengalê jî nûnerên Rêveberiya Xweseriya Demokratîk a Şengalê di merasîma şewitandina çekan a gerîla de amade bûn.
Hevserokê Meclîsa Xweseriya Demokratîk a Şengalê (MXDŞ) Nayîf Şemo ku tevlî merasîm bû, diyar kir ku her çend ev biryar ji bo civaka Êzidî di destpêkê de zehmet jî be ya girîng avêtina gaveke ber bi aştiyê ve ye û got, “Tinekirina çekan destpêkeke nû ye. Eger Rêber APO baş li ser pêngavê lêkolîn nekira, helbet wê ev bang nekiribûya. Serok Apo dizane ku êdî çareserî di şer de nîne, çareserî bi siyasetê pêkane.”
Nayîf Şemo destnîşan kir ku bi vê gavê re aştî pir nêzîk bûye.
Ji beşdarên merasîma gerîla Cîgirê Hevserokên Desteya Rêveber a Şengalê Dexîl Îbrahîm jî destnîşan kir ku çekên ku zêdeyî 40 salan têkoşîn pê dihate kirin, ji bo gelek şervanan bibûn parçeyek ji canê wan, lê belê li ser banga Rêber Ocalan, ev çek bi tevahî hatin îmhakirin.
Dexîl Îbrahîm diyar kir ku ev gav wê bêguman wê aştiyê bi xwe re bîne û tişta ku diket ser milê Rêber APO hatiye pêkanîn. Wî bang li dewletê kir ku ew jî gavên şênber bavêjin, lê mixabin heta niha dewletê gavên pêwîst neavêtine.
Her wisa anîn ziman jî ku eger dewleta Tirk bixwaze ev pêngav bi ser bikeve, divê guh bide banga Rêber Apo ya ji bo civakeke aştiyane û demokratîk.
Dexîl Îbrahîm destnîşa kir ku li gorî wan ev pêngav dikare li seranserê Rojhilata Navîn aştî û wekheviyê bîne û got, “Tunekirina çekan wekî nîşana îradeya ji bo çareseriya siyasî û aştiyê tê dîtin û hêviyek mezin e ku aliyên din jî bersiv bidin vê banga girîng.”
