Di 27’ê Sibatê de Rêber Apo “Bang Aştî û Civaka Demokratîk” kir û ji rayagiştî re parve kir ku nexşerêya vê pêvajoyê jî bi nivîsandina manîfestoyê daniye holê. Beşa destpêka manîfestoyê, wek “rapora polîtîk” ji Kongreya 12’emîn ya PKK re hat pêşkêş kirin û ji aliyê Gerîlayên Tevgera Azadiya Kurd ve hat xwendin û nîqaşkirin. Dema ku manîfesto gihîşt destê gerîlayên jin, ji bo manîfestoya serdemê ji her alî ve fêm bikin; bi berdewamî dixwînin û nîqaş dikin. Gerîlayên jin Axîn Jêhat û Feraşîn Amanos ên Manîfestoya Aştî û Civaka Demokratîk xwendin hestên xwe yên der barê manîfestoyê de, raman û bîryardariya xwe bi ajansa me ANF’ê re parve kirin.
MANÎFESTO, ENCAMA BERXWEDANIYA RÊBERTÎ YA LI DIJÎ TECRÎDÊ YE
Gerîla Axîn Jêhat anî ziman ku manîfestoya Rêber Apo ya piştî paraznameyên dawî nivîsandî, bi taybet li gel gerîlayên jin kelecanek mezin afirand, hêz da û ravekirina van hestan ne hêsan e. Gerîla Axîn Jêhat got ku bi kelecana manîfestoyê em ê gavên mezintir biavêjin û pêşengtiyê bikin.
Gerîla Faraşîn Amanos jî anî ziman ku armanca tecrîda giran a li ser Rêber Apo tê meşandin ew e ku neyê hiştin fikrên Rêber Apo bigihîjin gerîla, gelê Kurd û tevahiya cîhanê. Gerîla Faraşîn diyar kir ku di encama berxwedana Rêber Apo ya li hemberî tecrîdê de, ew gihîştine vê manifestoyê.
RÊBERTÎ, JI HER DEMÊ ZÊDETIR NÊZÎ ME YE
Gerîla Faraşîn Amanos, hestên xwe yên der barê manîfestoyê de wiha anî ziman; “Dema manîfesto gihîşt destê me em pir keyfxweş bûn, me hevok bi hevok li ser manîfestoyê nîqaş kir. Me hewl da em fêm bikin ka Rêbertî çi dibêje. Me hîs kir ku Rêbertî ji her demê zêdetir nêzî me ye.
Xala ku Rêber Apo di manîfestoyê de herî zêde bal dikşîne ser jî, xwedîderketina li nirxên civakî ku di şexsê jinê de hatiye înkarkirine.
Rêbertî azadiya civakê hertim bi azadiya jinê ve digre dest. Rêber Apo dibêje rewşa ku niha civak tê de ye bi dîrokê ve girêdayî ye. Têgeha kujerê qestî jî di nav vê dîrokîbûnê de tê pênasekirin. Rêbertî dibêje komên nêçîrvan xwe rêxistin dikin û êrîşî nirxên civakê dikin. Kujerê qestî heya roja me ya îro tê. Dibe ku şiklê wî hatibe guhertin, rêbaz hatibe guhertin lê naverok û hişmendî hîn jî eynî ye.”
‘TU ÇIQAS RÊXISTINKIRÎ BÎ TU EWQAS HEYÎ’
Gerîla Faraşîn Amanos derketina çiya ya gerîlayên jin wek îsyana li hember koletî û zextê pênase kir û nirxandinên Rêber Apo yê li ser rêxistinbûnê jî bi van gotinan anî ziman; “Rêbertî dibejê ‘Tu çiqas rêxistinkirî bî, tu ewqas heyî’ ev bi taybet ji bo me jinan derbasdar e. Wek jin rêya rizgariya me têkoşîn û rêxistinbûna me ye. Ew îrade û fikir heye, hebûn jî hatiye îspatkirin. Piştî vê ji bo em azadiyê bijîn divê em wek jin erk û berpirsiyartiyên ku dikevin ser milê xwe bînin cih.”
Gerîlayan herî dawî di şexsê jin û ciwanan de bang li hemû beşên civakê kirin ku xwedî li vê pêvajoyê derkevin û wiha gotin: “Manîfestoya Aştî û Civaka Demokratîk; ji bo kesên azadîxwaz, li hember vê pergala qirêj û desthilatiyê li ber xwe didin, hemû civakên bindest û li roniyekê digerin bersiveke û rêya têkoşînê ye. Divê herkes destê xwe bixe bin kevir û xwe zêdetir berpirsiyar hîs bikin. Kurdistana sosyalîst û demokratîk encax em bi hev re dikarin ava bikin. Ev berpirsiyarî dikeve ser milê herkesî.”
