Tevgera Azadiya Jinên Êzidî (TAJÊ) ji ber salvegera 11’emîn a Fermana 3’ê Tebaxa 2014’an li navçeya Xanesorê ya Şengalê semînerek lidar xist. Semîner li Meclîsa Gel a Xanesorê pêk hat û endamên sazî û rêxistinên gel ên li herêma bakur a çiyayê Şengalê beşdar bûn.
Li dû deqeyeke rezgirtinê ya ji bo bîranîna cangoriyan, endama TAJÊ Kinê Xidir axivî, şehîdên fermanê bi bîr anî û got, “Em herdem qala fermana talan û zehmetiyê dikin, lê ya girîng ewe ku em çawa xwe ji fermanê biparêzin, behskirina fermanê ne çareserî ye, lê belê xwe rêxistinkirin, girîngîdayîna perwerdeyê û mezinkirina hêzên YBŞ-YJŞ’ê wê bibe bersiva ji bo fermanê.”
Piştre kesên amade li ser 11. salvegera fermanê nêrînên xwe anîn ziman û diyar kirin ku êdî lazime civak bi xwe rêxistinkirina xwe, rê li ber fermanê bigire û careke din pişta xwe bi ti kesekî girê nede. Piştî axaftinan, sînevîzyonek li ser fermanê hate pêşandan.
Di dawiyê de Koma Şanoyê ya Navenda Stiya Nexşa derket ser sehnê û li ser berxwedana jinên Êzidî li hember koletiyê şanoyek pêşkêş kirin.
