Li avahiya Walîtiya Helebceyê bi amadebûna waliya Helebceyê Nuxşe Nasih û rayedarên din ên bajêr derbarê zerer û ziyanên şewata ku di rojên borî de li Helebceyê derketî, civînek a çapemeniyê hat lidarxistin.
Waliya Helebceyê Nuxşe Nasih di destpêka axaftina xwe de spasiya hemû kesên ku di vemirandina agir de bûne alîkar kir û got: “Amêrên pêwîst ên vemirandina agir li berdest nebûn. Lê me daxwaza 49 amêrên cûda yên vemirandina agir kirine. Daxwaza me li desteya wezîran hatiye qebûlkirin û niha li benda wezareta darayîne daku budce ji bo kirîna van amêran veqetîne.”
Nuxşe Nasih xwest wezareta darayî di zûtirîn dem de budce ji wan re veqetîne û got: “Herêma me çiyayî û asê ye, pêwîstiya me hîn zêdetir bi çêkirina rêyên deverê heye da ku di demê derketina şewatan de tîmên agirkujiyê bikarin bi asantir mudaxele bikin.”
Waliya Helebceyê da diyarkirin ku li gor lêkolînên destpêkê zêdetirî 5 hezar donim daristanên xwezayî, erazî û baxên welatiyan şewitîne.
Her wiha eşkere kir ku wê komîsyonek ji bo lêkolînkirina sedemê derketina şewatê bê avakirin û her kesek bibe sedemê derketina şewatê wê were cezakirin.
