Ji bo endamê Komalên Ciwan Arjen Yavûz (Çiya Rizgar) ku hat eşkerekirin ji ber nexweşîna pençeşêrê di 25’ê Tebaxê de şehîd bûye, li navçeya Şemrex a Mêrdînê şîn hat danîn. Bi pêşengiya ciwanan bi girseyî serdana şînê hat kirin. Rêveberên MEDBYA-DER’ê û gelek siyasetmedar jî di nav de gelek kesan serdana şînê kir. Girseya ku li Parka Narîn Yaşamê kom bû, heya cihê şînê ya li Taxa Poyrazê hat danîn meşiya.
Kesên tevlî meşê bûn, wêneyê Yavûz bi ber xwe vekirin. Di meşê de tim dirûşmeyên wekî “Şehîd namirin” û “Bê Serok jiyan nabe” hatin berzkirin. Her wiha pankarta li ser “Bi sond û peyman em şopdarê te ne” nivîsandî û wêneyên Rêberê Apo, Huseyîn Akdogan (Armanc Kerboran) û Arjen Yavûz li ser hat hilgirtin.
Di dema serdana şînê de li ber sirûda Çerxa Şoreşê rêz hat girtin. Endamên Meclisa Ciwanan a DEM Partî û DBP’ê diyar kirin ku ew ê xwedî li têkoşîna Arjen Yavûz derkevin. Her wiha Hevserokê MEBYA-DER’ê Salih Kûday sersaxî ji malbatê re xwest.
Parlamentera DEM Partiyê ya Mêrdînê Bêrîtan Guneş Altinê jî diyar kir ku Yavûz temenê xwe ji bo azadiya ciwanan feda kiriye û got ku ew ê xwedî li mîrateya ku wî hiştiye derkevin.
Dayik Ayten Yavûz jî wiha got: “Wekî navê xwe bû çiyayek. Êşa min mezin e lê ez pê serbilid im. Ez hêvî dikim ku aştiyekî bi rûmet çêbibe.”
