Nûnerên partiyên siyasî û rêxistinên sivîl jî beşdarî daxuyaniya ku li ber Lîseya Anadoluyê ya li taxa Selahaddîn Eyûbî ya li navçeya Hewag a Rihayê hat lidarxistin bûn.
Di çalakiyê de pankarta “Em perwerdehiya bêpere, zanistî, wekhev û azadîxwaz a bi zimanê dayikê dixwazin” hate vekirin.
Hevseroka DEM Partiyê Ayşe Surucu diyar kir ku zarokên kurd nikarin bi zimanê xwe perwerdehiyê bibînin û got, “Divê jiyaneke ku zarok bikaribin bi zimanê xwe bijîn were afirandin.”
Ayşe Surucu anî ziman ku bi hezaran zarok ji ber karên çandiniyê yên demsalî ji mafê xwe yê perwerdehiyê bêpar in û bi bîr xist ku 4 kesên ku 2 jê zarok bûn li Herranê wek karkerên findiqan diçûn kar di qezayek trafîkê de jiyana xwe ji dest dan û 17 kes jî birîndar bûn.
Hevseroka DEM Partiyê ya Hewagê Burçîn Satici jî bal kişand ser pirsgirêkên xizaniya zarokan û perwerdehiyê.
Burçîn Satici bang li Wezareta Perwerdehiya Neteweyî kir ku divê li hemû dibistanan xwarinên belaş û bi tendurist bên dayîn û ji bo perwerdehiyê bêhtir budçe bê veqetandin.
Daxuyanî bi çepik û berzkirina dirûşmeyên “Jin, jiyan, azadî” bi dawî bû.
