Dema ku kesên li dû dimînin biryarê didin ku qala şehîdan bikin, dema qala wan dikin yan jî têkildarî wan dinivîsin tim di nava endîşeya kêmhiştina hin tiştan de ne. A rastî hişta ku dibe sedema kêmhiştina hin tiştan jî ev endîşe ye. Çimkî yên li dû mayî, hewl didin ku kêm jî be bi rêya qalkirina wan xwe ji wê şermezariyê xilas bike. Carna dema ku nikare vê yekê jî bike, wê demê neçar dimîne ku li gel êşa li ser dilê xwe bijî.
Çawa ku her şehadet, şehadeteke zû ye, ji kesên dimînin re jî telaşa derengmayînê dimîne. Ji ber vê yekê hemû tiştên ku wê derheqê heval Senar de werin nivîsandin, ji ber ku wê bi telaşa derengmayînê werin nivîsandin wê kêm bimînin.
Ji bo ku em qala heval Senar bikin, divê em hinekî li berxwedana Farqînê binêrin, ji bo vê yekê jî divê em berê xwe bidin wê serdemê. Weke tê zanîn pêvajoya ku dewletê li gel Rêbertî di dawiya sala 2012’yan de da destpêkirin, ji ber ku perçeyeke taktîkên AKP’ê yên gîrokirinê bû, wê encamek bi dest nexista. Bi rastî jî ji ber ku pêvajo di çarçoveya xwesteka Erdogan de pêş neket, peymana ku di 28’ê Sibata 2015’an de hate îmzekirin, nêzîkî piştî 20 rojan ji aliyê Erdogan ve hate redkirin.
Erdogan ê îro dibêje ku haya wî ji peymana dîrokî ya li koşka girêdayî Serokkomariyê hatiye îmzekirin, tune ye, pêşiyê ev peyman piştre jî hilbijartinên 7’ê Hezîranê ku HDP’ê ji sedî 13’yê dengan wergirtibû, red kirin. Piştî hin êrîşên ku bi destê DAÎŞ’ê dan kirin, dawiyê di Tebaxa 2025’an de li gel bi dehan balafirên şer li dijî Herêmên Parastinê yên Medyayê êrîş dane destpêkirin û şerî dest pê kir.
Li ser bêrêziya leskerên dewleta Tirk ên li dijî cenazeyê hevrê Ekîn Wan a ku li Gimgimê tê şehîdkirin, şeva 16’ê Hezîranê gerîla daketin Gimgimê û bi gel û ciwanan re bû yek; hema bibêjin tevahiya navçeyê bi dest xistin û xwerêvebirin îlan kirin.
BERXWEDANA FARQÎNÊ
Piştre bi pêşengtiya gerîla û ciwanên Kurdistanê, li gelek bajar û navçeyên Kurdistanê li ser hev îlanên xwerêvebirinê hatin kirin. yek ji herêma ku lê îradeya xwerêvebirinê hate îlankirin û bû şahidê berxwedaneke bêhempa bêguman Farqîn bû.
Ev pêvajoya berxwedanê ya bi fermandariya Şehîd Senar Garzan dest pêkir, weke yek ji berxwedana mezin a di dîroka berxwedana Kurdistanê de tê bibîranîn. Hevrê Senar ê ku yek ji fermandarê leheng ê vê berxwedana ku em 11’êmîn salvegera wê de bi bîr tînin, di sala 1988’an de li Bedlîsê di nava malbateke welatparêz de ji dayîk bûye.
Hevrê Senar ê ku xwîşkeke wî ya mezin e şehîd e û yek jî di nava refên gerîlayan de ye, di destpêka sala 2014’an de li ser Amedê tevî nava refên gerîlayan dibe. Hevrê Senar ê ku piştî sal û nîvan ji berxwedana mezin re fermandariyê dike, di nava demeke kurt de tevî karwanê şehîdan dibe û li gel berxwedana Farqînê ku yek ji destanên lehengiya dîroka Kurdistanê ye, cihê xwe yê di dîrokê de digire.
‘HEVAL QET XWE NEWESTÎNIN, EM Ê VÊ QADÊ BERNEDIN’
Min di sala 2015’an de li Farqîna ku herêma berxwedana heval Senar ew nas kir. Dema ku pêvajo veguherî şerî, tevgerîna ji bo xebatkarên partiyê jî gelekîzehmet bûbû. Ji ber vê yekê li gel pêşengên partiya siyasî hin qada tevgerînê ava dibû. Dema ku em ji bo ragihandina biryara mezinkirina berxwedanê ya li gel hin taktîkên nû yên partiyê çûn Farqînê li ba heval Senar, yekem gotina Heval Senar a ji me re; ‘’Heval qet xwe newestînin, em dev ji vê qadê bernadin’’ bû.
Dema ku em pê hesiyan di hevdîtinên nûnerên partiya siyasî ya navçeyê yên li gel nûnerên dewletê de ketine nava ferzkirinên bi vî rengî, em fêr dibûn ku Heval Senar bes ne li dijî dijmin, di heman demê de li dijî nêzîkatiyên teslîmbûnê jî têkoşîn dida meşandin. Piştre em bûn şadihê ked, fedekarî, biryardarî, xîret û baweriya hevrê Senar. Hevrê Senar ê ku di di jiyana xwe ya têkoşînê de gelek serkeftin bi dest xistin, bû pêşengê hin destpêkan. Wê were bîra kesên ku ew pêvajo şopandin û dizanin ku di wê serdemê de Farqîn tim di rojeva çapemeniyê de bû.
Li gel tevlîbûna Şehîd Nûda û Şehîd Munzûr ên ji tevgera ciwanan a ji bo pêşengtiya berxwedanê, Farqîn bi ciwan û gel re yekbûnek ava kir û veguherîbû navendeke berxwedanê. Piştî salên dûr û dirêj tankên dijmin cara ewil li navenda bajêr a Farqînê dihatin bikaranîn. Hatina leşkeran a ji bo navenda bajêr, berteka gel û ciwanan a li dijî vê yekê û dîmenên têkildarî vê yekê hê jî di bîra me de ne.
Berxwedana di pêşengtiya Şehit Senar de, di nava gel û ciwanan de baweriya şoreşê xurt kiribû. Û ji ber vê yekê jî gelê Farqînê ji hemû gavan zêdetir xwedî li berxwedanên xwerêvebirinê derdiket.
BERXWEDANA LI HEMBERÎ TANKAN A BI ÇEKÊN POMPEYÎ
Di pêvajoya destpêka xwerêveberinê de, binê gotina dijmin a; ‘’Di pêvajoya çareseriyê de bajar bi çek û cebilxaneyan tije kirine’’ vala bû. Demeke kurt piştî biryara berxwedana xwerêvebirinê ji qadan re cebilxane hate neqilkirin.
Destpêkirina barkirina ebilxaneyan û dorpêçkirina qadên berxwedanê ya ji aliyê dijmin ve bi hev re çêdibûn. Ji ber vê yekê weke li hemû deran li Faqînê jî pirsgirêkên cebilxaneyê yên cidî hebûn. Wisa bû ku gelek ciwanên ku ji Farqîn û Êlihê tevlî berxwedanê dibûn, bi çekên nêçîrê yên pompeyî li ber xwe didan.
Yanî baweriya şoreşê ya di berxwedana fermandariya Heval Senar de, bi qasî ku wê li dijî tankan bi çekên pompeyî encam were standin, bi hêz bû. Û tişta ku ev bawerî afirand jî helbet biryardariya Heval Senar bû.
Tevî ku xwedî tecrûbeyên gerîlatiya salên dirêj nebû jî taktîkên hevrê Senar ên di berxwedanê de bûn sedem ku di demeke kurt de bibe fermandar. Hin krîterên şervanbûna serkeftî hene; lê belê krîterên fermandariya serkeftî bilind in. Heval Senar jî fermandarekî serkeftî yê xwedî van krîterên bilind bû.
ŞEHADETA WÎ, BERXWEDAN MEZIN KIR
Piştî şehadeta wî ya lehengî berxwedan mezin bû, berdewam kir û Farqînê şahidiya hin fermandarên din kir; lê belê vê rêyê ronahiya xwe ji Heval Senar girtibû. Ji ber vê yekê ye ku piştî ew qas salan jî ciwanên li Faqîn yan jî cihên cuda ên welatê ne bi îmzeya ‘’Yekîneya Tojhilanînê ya Şehîd Senar’’ çakaliyan li dar dixin û li ser dîwarên nivîsên; ‘’Şehîd Senar nemir e’’ tên nivîsandin. Ev hemû yek ji wan nîşaneyan e ku di nava PKK’ê de şervanên mezin û kesên şerên mezin bi rê ve birine tu caran nayên jibîrkirin.
Ji ber vê yekê em şervan û fermandarê mezin Şehîd Senar Garzan bi rêzdarî bi bîr tînin.
