Dayikên Aştiyê yên ku bi salan e ji bo pêşî li mirinên li Kurdistanê û Tirkiyeyê bigirin têdikoş in, dixwazin pêvajoya nû ya ku Rêber Apo daye destpêkirin bi aştiyê encam bide. Yek ji van dayikan jî Afîfe Kartal e ku dayika şehîd û girtiyek e. Yek ji hezaran jinên Kurd e ku li Kurdistanê li dijî zordariyê ji bo aştiyê têdikoş e. Keça Afîfe Kartal Têkoşîn di sala 2011’an de tevlî PKK’ê bû û di sala 2017’an de şehîd bû. Kurê wê ku 22 sal cezayê girtîgehê lê hatibû birîn jî, hê girtî ye. Afîfe Kartal, biryardariya xwe ya ji bo têkoşîna aştiyê didomîne.
Dayika Aştiyê Afîfe Kartal ji ajansa me re axivî û wiha got, “Piştî ku Rêberê Gelê Kurd Abdullah Ocalan pêvajoya aştiyê da destpêkirin, weke dayikan me piştgirî da. Divê tevahî cîhan jî piştgirî bide. Çawa ku Birêz Ocalan got ku ew ê pêvajoyê bide destpêkirin û deriyên aştiyê veke, divê dewlet jî destê xwe yê aştiyê dirêjî Birêz Ocalan bike. Di destpêka pêvajoya aştiyê de, wan got, ‘Bila Ocalan were û di Civîna Koma DEM Partiyê de biaxive.’ Lê belê wan soza xwe bi cih neanîn. Heta emrê me têrê bike em ê piştgiriyê bidin aştiyê. Ji ber ku aştî bi rastî tiştek xweş e. Em şer naxwazin.”
‘DIVÊ DEWLET DESTÊ AŞTÎYÊ YÊ HATÎ DIRÊJKIRIN BIGIRE’
Afîfe Kartal, destnîşan kir ku divê dewleta Tirk destê aştiyê ya ku Rêber Apo dirêj kiriye bigire û wiha domand, “Em tenê aştiyê dixwazin. Rêber Apo aştiyê dixwaze. Divê em xwedî li rêya aştiyê ya ku Rêber Apo vekiriye derkevin. Weke dayikên Aştiyê ev 25 sal in em ji bo aştiyê têdikoş in û li her qadê daxwaza aştiyê dikin. Em tenê wekhevî û aştiyeke birûmet dixwazin. PKK’ê ji bo aştiyê berpirsyariya xwe bi cih anî. Divê êdî dewleta Tirk jî berpirsiyariyên xwe bi cih bîne.
Eger Serokkomar Erdogan bi rastî jî aştiyê dixwaze, divê daxwazên me li ber çavan bigire. Zarokên Erdogan şer nakin; zarokên me şer dikin. Zarokên gelê Kurd her tim berdêl dane; tevî vê Kurdan her tim aştî xwest. Di merasîma veşartina cenazeyên zarokên xwe de jî her tim me daxwaza xwe ya aştiyê aniye ziman. Em êdî naxwazin cenazeyên şehîdan bibînin. Sê Dayikên Aştiyê di komîteya ku li Meclîsê hate avakirin de axivîn; Destûr nedihat dayîn ku bi Kurdî jî biaxivin. Li cihekî ku Kurdî qedexe ye, mirov dikare behsa aştiyek çawa bike? Em vê yekê qebûl nakin. Em dixwazin pirsgirêkên xwe bi zimanê xwe bînin ziman. Birêz Ocalan ji bo aştiyê çi ji destê wî tê dike.”
‘TENÊ MÎRATA KU EZ Ê JI ZAROKÊN XWE RE BIHÊLIM AŞTÎ YE’
Afife Kartal, di dawiyê de jî ev tişt gotin, “Divê Rêber Apo azad bikin. Divê gerîlayên me werin. Ew tenê aştiyê dixwazin. Yek ji zarokên min di vê rêyê de xwe feda kir. Kurekî min di girtîgehê de ye. Ji ber zordariya dewletê ez neçar mam koçber bibim. Keça min ji bo daxwazên vî gelî têkoşiya û canê xwe feda kir. Cenazeyê keça min di kîsikekê de radestî min kirin. Ji ber vê yekê heta dawiya emrê xwe em ê daxwaza aştiyê bikin. Tenê mîrateya ku ez ê ji zarokên xwe re bihêlim dê aştî be. Eger ez bimirim jî, zarok û neviyên min wê têkoşîna aştiyê bidomînin. Divê gelê Kurd xwedî li têkoşîna Rêber Apo derkevin. Xema Rêber Apo tenê aştî ye. Divê dewlet destê aştiyê ya ku Rêber Apo dirêj kiriye bigire.”
