Meclisa Sûriyeya Demokratîk (MSD) bi amadebûna rêveber û endamên partî û hêzên siyasî yên ji tevahî herêmên Sûriyeyê civînek lidar xist. Di civînê de pêşdeçûn û nîşaneyên qonaxa bê li gel veguherînên herêmî û navneteweyî, hatin nîqaşkirin.
Beşdarên civînê got Sûriye di qonaxeke dîrokî re derbas dibe û pêdiviya wê bi nêrînên siyasî yên berpirsyar heye ku ev pirsgirêkên heyî werin çareserkirin û berjewendiya sûriyeyiyan di ser hemû berjewendiyan re be. Hat gotin ku binketina hikumeta veguhêz di peydakirina xwestekên gel de alternatîfên nîştimanî yên berfireh ferz dike.
Beşdaran diyar kir ku divê Sûriyeyeke demokratîk a pirreng û nenavendî were avakirin da ku edalet û wekhevî werin mîsogerkirin, pirrengiya neteweyî, olî û çandî were pejirandin û sûd ji ezmûna Rêveberiya Xweser a Bakur û Rojhilatê Sûriyeyê were girtin.
Hat diyarkirin ku xwespartina li Hevpeymana Civakî rê li ber destûreke demokratîk, eniyeke nîştimanî ya demokratîk a serbixwe vedike.
Di civînê de hat gotin guhertinên lez di hevsengiyên hêzan û hevrikiya herêmî û navneteweyî ya li ser serweriyê de çêbûne û hat eşkerekirin ku divê çareserî hundirîn bin da ku îstîqrar pêk bê û xwestekên sûriyeyiyan peyda bikin.
MSDˊê hejmara cîgirên hevserokan ji 5’an daxist 2’yan.
Nivîsgeha Siyasî ya bi serkêşiya MSDˊê ya ji 15 endamên ku Desteya Hevserokatiyê ya MSDˊê diyar dike, hat nûkirin. Li gorî rêziknameyê, herî kêm ji sedî 40 nûnerên partiyên siyasî heye. Di sazûmaniya rêxistinî de jî Nivîsgeha Êl û Eşîran hat nûkirin.
Der barê belgenameya siyasî de jî pêşniyar hatin kirin ku nav û hin têgeh werin guhertin ku li gorî qonaxa heyî bin. Belgenameya siyasî ya MSDˊê di 2023ˊyan de hatibû derxistin.
Li kêleka wê pêşniyar hat kirin ku helwesta MSDˊê ya di nexşerêya 2023ˊyan de were guhertin da ku li gorî helwesta MSDˊê ya ji bo hikumeta veguhêz be.
Li gorî pêşniyarên hatine, belgenameya siyasî ya MSDˊê û nexşerêya wê dê ji hêla komîteya amadekar ve di demeke pêş de were guhertin.
Di dawiya civînê de hat gotin ku divê çareseriya Sûriyeyê li gorî sûriyeyiyan be û dûrî destwerdanên derve be.
MSDˊê vegera desthilatê yan jî hikumeta navendî red kir û banga diyaloga nîştimanî ya berfireh û tê de tevahî pêkhate amade bin û bi rêya dadgehên adilane sûcdarên mafên mirovan werin darizandin.
MSDˊê bang kir ku divê saziyên pêvajoya veguhêz ên serbixwe ji bo çavdêriyê li destûr û hilbijartinan bikin, werin avakirin û tevahî alî dûrî kîndariyê bikevin û dewleteke demokratîk a pirreng were avakirin.
