Fermandariya Giştî ya Hêzên Ewlekariya Hundirîn têkildarî operasyonên dawîn ên li Reqayê û herêmên li rojavayê Dêrazorê de daxuyaniyek da.
Fermandariyê da zanîn ku “di çend rojên borî de li Reqa û rojavayê Dêrazorê hemleyên ewlehiyê yên berfireh pêk hatin”.
Hate gotin: “Di encama van operasyonan de 61 kesên ku tên xwestin ku di terorîzm, sûc, belavkirin û bazirganiya hişbirê de beşdar bûbûn, hatin girtin. Her wiha wan gelek çek, cebilxane û teqemenî, tevî cureyên madeyên hişbir, di nav de mîsa krîstal, heşîş, Captagon û hebên din ên hişbirê desteser kirin. Tevî ku alavên ji bo bikaranîna madeyên hişbirê, mayîn, cebilxaneyên cur bi cur, bi sedan gule û cercûrên çekan hebûn.”
Di dewama daxuyaniyê de jî hate gotin: “Van hemleyan plana ewlehiyê ya berfireh temam kir ku cihên veşartgehên kesên ku tên xwestin, hedef digirtin. Tevî pevçûnên ku çêbûne jî lê hêzên me bi profesyonelî û rastbûnek bilind bersiv da û erkên xwe bi cih anîn. Di nav hêzên me de tu qurbanî çênebûn. Kesên hatine girtin ji bo dadweriyê hatin şandin.”
Fermandariya Giştî ya Hêzên Ewlekariya Hundirîn di dawiyê de diyar kir ku dê operasyonên wan bê navber dewam bikin “heya ku hemû cureyên terorîzm, sûc û madeyên hişbir ji holê werin rakirin”.
