Komîsyona Hevgirtina Neteweyî, Xwişk-Biratî û Demokrasiyê ya ku di Meclîsa Mezin a Neteweyî ya Tirkiyeyê de ji bo çareserkirina pirsgirêka Kurd dixebite, civîna xwe ya 11’emîn li dar xist. Serokê Federasyona Komeleyên Pîşesaz û Karsazên Rojhilat-Başûr-rojhilat (DOGUNSÎFED) Deniz Turk û Serokê Federasyona Eşîrên Kevnar Rasîm Aslan di civînê de nêrînên xwe parve kirin.
Serokê DOGUNSÎFED’ê Deniz Turk diyar kir ku projeyên siyasî yên ku ji damezrandina komarê ve pêk hatine, hewl dane di bin nasnameyek tenê de teşe bidin civakê û ev yek jî zextê li ser nasnameyên cûda dike.
Deniz Turk got, “Ev hewldan ne tenê nasnameyan tepeser kirin. Ev yek di navbera dewlet û nasnameyên hatine dûrxistin de rageşiyek domdar çêkir. Heke em bi kurtasî zirara ku ji ber şerê 40 salî çêbûye kurteber bikin, welat û herêma me zirara aborî û civakî dîtiye, bandoreke neyînî li ser jîngehê çêkiriye û zirarên madî û manewî yên girîng, nemaze windakirina can çêbûne.”
Denîz Turk li ser pêwîstiya hawîrdorek qanûnî û girîngiya reformên rêveberiya xwecihî û demokrasiyeke berfireh rawestiya û got, “Meseleya Kurd bi pirsgirêka demokrasiya Tirkiyeyê ve girêdayî ye. Bêyî demokrasiyeke berfireh zehmet e ku bi tevahî were çareserkirin.”
SPAS JI BO ABDULLAH OCALAN
Serokê Federasyona Eşîrên Kevnar Rasîm Aslan diyar kir ku pevçûn rê li ber windahiyên giran vekiriye. Aslan anî ziman ku di serdema piştî 2005’an de polîtîkayên înkarê hêdî hêdî hatine guhertin û spasiya xwe ji bo banga Rêber Apo ya ji bo danîna çekan anî ziman û wiha domand: “Wekî Federasyona Eşîrên Kevnar, em spasiya Abdullah Ocalan dikin ji bo banga wî ya ji bo danîna çekan.”
PROJEYA VEGERA GUND
Aslan got, “Çareserkirina gazindên welatiyên me yên ku neçar man koç bikin û ji jiyana xwe ya li gund û mezrayan hatin qutkirin, wê bi projeya vegera gundan pêkan be.”
