Komîteya Wezîran a Konseya Ewropayê têkildarî biryarên xwe yên ‘Koma Gurban’ biryara xwe ya navberê ya bi hejmara CM/ResDH (2025)264 eşkere kir.
Dîrektora Tirkiyeyê ya Projeya Piştgiriya Dozên Mafên Mirovan ên Tirkiyeyê (Turkey Human Rights Litigation Support Project- TLSP) parêzer Ayşe Bîngol Demîr biryara Komîteya Wezîran ji ajansa me re nirxand.
‘KOMÎTE BALÊ DIKIŞÎNE SER PIRSGIRÊKÊN AVANÎ’
Ayşe Bîngol Demîr diyar kir ku biryara Komîteya Wezîran balê dikişîne ser pirsgirêkên avanî ku rêxistinên hiqûqê yên neteweyî û navneteweyî û baroyan di agahdarkirina Pîvana 9.2 işaret pê kiribûn û got, “Biryara navberê ya bi hejmara CM/ResDH (2025) 264 a 17’ê Îlona 2025’an agahdarkirina Pîvana 9.2 destnîşan kir ku ji aliyê TLSP, ELDH, MAF-DAD û LLG ve; her wiha ji aliyê ÖHD, İHD, TİHV, TOHAV, ÇHD, CİSST, Baroya Amedê, Baroya Wanê, Baroya Şirnexê, Baroya Colemêrgê û Baroya Rihayê ve hatibû pêşkêşkirin. Her wiha balê dikişîne ser pirsgirêkeke avanî ku biryarên Koma Gurban ku biryara (2) a Ocalan jî di nav de ye bi cih nehatiye anîn, mehkûmên ku bi cezayê girtîgehê yê heta bi hetayê yê girankirî hatine cezakirin ji mekanîzmaya jinûve nirxandina ceza bêpar têne hiştin.”
‘ÎRADEYA GUHERÎNÊ TÊ TEŞWÎQKIRIN’
Ayşe Bîngol anî ziman ku komîteyê li ser reform û guhertinên qanûnî rexne li dewleta Tirk kiriye û got, “Komîte rexneyê li Tirkiyeyê dike, ji ber ku heta niha tedbîrên qanûnî û tedbîrên din ên pêwîst wernegirtiye û di vê mijarê de bangê dike ku bi lez gavê biavêje. Komîte işaretê bi plansaziyên çalakiyan û pêvajoya diyalogê ya heyî dike û di vê mijarê de îradeyeke guherînê teşwîq dike, li ser pêwîstiya bi reformê zexta siyasî dewam dike.”
Ayşe Bîngol ragihand ku ragihandina rêxistinên hiqûqê di çarçoveya Pîvan 9.2 de kirin di biryara navberê ya komîteyê de pêwendiya xwe bi agahdarkirina rêxistinên hiqûqê yê navneteweyî yên weke TLSP, ELDH, MAF-DAD û LLG heye û bi vî rengî dewam kir: “Komîte di biryara xwe ya navberê de bi eşkere qala Peymanê, îçtihada Dadgeha Mafên Mirovan a Ewropayê û karên erênî yên welatên endamên Konseya Ewropayê dike, işaretê bi pêwîstiya reformeke li gorî vê dike û balê dikişîne ser wê meyla navneteweyî ku piştî destpêkirina înfaza ceza herî dereng di nava 25 salan de divê jinûve bê nirxandin. Bangê dike ku divê ji mînakên dewletên din ên endamên Konseya Ewropayê sûd bê wergirtin ku pêwendiya vê yekê jî bi analîzên pêkanînên mînak heye ku TLSP, ELDH, MAF-DAD û LLG’ê di ragihandina 9.2 de pêşkêş kiribûn.”
Ayşe Bîngol anî ziman ku di çarçoveya biryarê de komîte ji Tirkiyeyê dixwaze ku têkildarî gavên di vê mijarê de bêne avêtin heta Hezîrana 2026’an agahiyê bide û got, “Ev yek jî nîşan dide ku komîte wê vê komê di Îlon yan jî Kanûna 2026’an de careke din bixe rojeva xwe.”
