Beriya 32’emîn Xelatên Rojnamevaniyê yên Mûsa Anter û Şehîdên Çapemeniya Azad, malbatên xebatkarên Çapemeniya Azad ên hatine qetilkirin serdana ofîsa rojnameya Yeni Yaşamê ya li Beyoglû ya Stenbolê kirin.
Malbatên ku di dema serdanê de axivîn, peyama “Wekî malbat, em ê tu carî nehêlin kêfa dijmin bê. Em li vir bi rastî dibînin ku pênûsên zarokên me neketine erdê. Zarokên me rûmeta me ne. Em ê tu carî dev ji têkoşîna xwe bernedin” dan.
Malbatan bal kişand ser Pêvajoya Aştî û Civaka Demokratîk û gotin ku ew piştgiriyê didin pêvajoyê ji bo ber bi aştiyê ve biçe.
Bavê Nazim Daştan ê rojnamevan ku di 19’ê Kanûna 2024’an de di êrîşa SÎHA’yê de hat qetilkirin, Mehmet Alî Daştan got: “Me sozek da xwe. Her çend cîhan bi ser me de hilweşe jî, em ê dîsa rabin ser pêyan. Bila her kes zanibe ku em ê bi ser bikevin. Em ê dest ji vê pêvajoyê bernedin. Em ê şehîd Apê Mûsa û bi taybetî şehîdên xwe ji bîr nekin. Em ê wan her tim bi bîr bînin. Şehîdên me, Nazim û Cîhan, rûmeta me ne.”
