Berdevka Ofîsa Têkiliyan a Partiya Yekîtiya Demokratîk (PYD) Leyla Ehmed têkildarî geşedanên dawî, zimansoriya Ehmed El Şera yê li dijî Rêveberiya Xweser û Hêza Sûriya Demokratîk (QSD) û nenavendîbûna Sûriyeyê ji ANF’ê re axivî û anî ziman ku divê her ref û etnîsîte, her ol û mezheb li ser kevneşopiya xwe û li ser çanda xwe bi azadî bijîn, divê mafê wan neyê binpêkirin û hingê wê Sûriyeyek demokratîk pêk were.
Leyla Ehmed da xuyakirin ku li Sûriyeyê êrîşên li ser jin, zarok û pîran berdewam dikin û destnîşan kir ku komên îslamî yên di bin navê îslama radîkal de li dijî pergala Rêveberiya Xweser ku hemû rengan di nava xwe de dihewîne, bi çavsoriyeke bê hempa êrîşan pêk tîne û wiha got: “Em niha di pêvajoyeke gelekî hesas re derbas dibin, divê em hevgirtinê pêk bînin, divê em her netew bi hevre jiyan bikin û di nava civakeke azad û demokratîk de jiyan bikin.”
‘EM IN XWEDÎ DESTKEFTÎ’
Leyla anî ziman ku li ser netewên weke Elewî û Dûrziyan komkujî pêk anîn û hovîtî li wan hatin kirin, bi hezaran jin û zarok hatin qetilkirin û got, “Niha divê em bi yek destî Sûriyeyekî demokratîk bidin avakirin. Em dibînin ku Hikumeta Nû ya Veguhêz bi zimanekî tund nêzî Rêveberiya Xweser dibe. Êdî em dixwazin çareserî pêk were, em xwedî destkeftî ne û em di asteke gelekî mezin de ne û êdî bi riya me çareserî tê kirin. Niha hikumeta nû ya veguhêz dixwaze tenê yek alî be, pêkhate hevdû qebûl nekin û komkujiyan berdewam bikin. Lê em êdî rê nadin wê yekê, em ê di projeya xwe ya çareseriyê û demokratîkbûnê re riya xwe berdewam bikin û êdî ji bo Sûriyeyê çareseriyeke mutleq di her warî de were pêkanîn.”
‘EM SÛRIYEYEKE NE NAVENDÎ DIXWAZIN’
Leyla Ehmed da xuyakirin ku hêza wan a li Sûriyeyê Hêzên Sûriyeya Demokratîk (QSD) e û wiha bilêv kir: “Hêza me gelan diparêze, her tiştên ku ji bo gel tên kirin me bi hêz dike, heta bi saziyên me yên rêxistinî jî Ii ser wê esasê tevdigerin. Niha di nava Rêveberiya Xweser de her ref û netew tên parastin, her ol û mezheb dikarin li ser kevneşopiya xwe xwe bidin îfadekirin. Êdî em Sûriyeyeke ne navendî dixwazin. Divê em bikaribin li dijî her cure tundî û destdirêjiyê li ber xwe bidin.
Her pêkhate, Kurd, Ereb, Elewî, Dûrzî û hemû netewên din li Sûriyeya ne navendî divê bikare bi rengê xwe, çand û kevneşopiya xwe bi azadî bijî. Divê her kes li kur dibe bila bibe bi azadî û wekhevî bijî. Di navendîbûnê de her tiştên li dijî mirovahiyê tên kirin, niha komkujî, qetilkirin û tundî tên kirin. Divê êdî em li hemberî wê yekê bisekinin. Divê em azadiya tevahî gelan misoger bikin û Sûriyeyeke ne navendî ya pir rengî ava bikin ku hemû maf têde werin parastin.”
