Piştgiriya navneteweyî ya ji bo pêvajoya “Aştî û Civaka Demokratîk” a ku ji hêla Rêber Apo ve hatiye destpêkirin, berdewam dike. Partiya Sosyalîst (SP) a ku partiya siyasî ya duyemîn a Swîsreyê ye derbarê mijarê de daxuyaniyek nivîskî weşand. SP’ê bang li desthilata Tirk kir ku ji bo serketina pêvajoyê reformên qanûnî pêk bîne.
‘PKK JI AŞTIYEKE ADÎL RE AMADE YE’
Di daxuyaniyê de hate diyarkirin ku PKK’ê ji bo çareseriya demokratîk a pirsgirêka Kurd gaveke dîrokî avêtiye û got, “Niha pirs ev e: Gelo Serokkomarê Tirkiyeyê Erdogan amadeye ku şansekê bide demokrasiyê?”
Di daxuyaniyê de banga dîrokî ya Rêber Apo ya 27ê Sibatê hate bibîrxistin û wiha domand: “Piştî vê bangê, rêxistinê fesixkirina xwe ragihand. Di meha Tîrmehê de komekê çekên xwe şewitandin, bi vî awayî eşkere kir ku ew ji aştiyeke adîl re amade ye. Berpirsyarî li aliyê hikûmeta Tirk e.
‘DIVÊ ERDOGAN MODELA ROJAVA BIŞOPÎNE’
Ji bo çareseriya pirsgirêka Kurd, mafên siyasî û çandî yên Kurdên li Tirkiyeyê bi destûra bingehîn bên misogerkirin û ji bo demokratîkkirina welêt pêwîstî bi reformên qanûnî heye. Divê zexta li ser muxalefetê bi dawî bibe. Û divê Erdogan êrîşên li ser Rojava yên ku qanûnên navneteweyî binpê dikin, rawestîne. Ev hewldanên ku ji bo aştiyeke mayînde tên dayîn, hem ji bo gelê Kurd, hem ji bo gelê Tirk û hem jî ji bo gelên herêmê derfeteke dîrokî ye. Rojava ya li Sûriyeyê, ji bo Rojhilata Navîn mînaka civaka demokratîk û piralîparêz e.
Niha erka ku dikeve ser milê Erdogan û hikûmeta wî ew e ku vê mînakê bişopînin û şensekê bidin demokrasî û aştiyê.”
